008

Байбек мырза, Алматыда кеңестік атаулар, тау-тасында фашистік свастикалар неге көбейіп кетті?

Алматыдағы тау-тастары фашистік свастикаға толып кетіпті. Шыңға өрмелеген туристер де фашистік белгіні көп жерден көріп көңілдері түскенін айтуда. Ал бұл сорақы таңбаларды тастарға кімдердің салып жүргенін анықтау әзірге мүмкін болмай тұр. Адамдар жиі жүретін жерлердегі суретті альпинистер өшіріп, оны гүл немесе терезе қылып түзетумен әлекке түсіп жүр екен.

 

Егер әңгіменің ашығын айтар болса, Алматының тау-тасы тұрмақ қаланың ішінде де тез арада өзгертуді қажетсінетін оғаш атаулар жетіп артылады.  

Иә, Алматының тау-тасына шықсаң Гитлер тіріліп келгендей күй кешесің, ал етектегі қалаға түссең, мейрамхана, дәмхана, қонақүйлердің маңдайшасындағы ағылшын, орыс тіліндегі жазуларға көзің түсіп, бөтен елде жүргеніңді ыңғайсыз жағдайға тап боласың.  

Осыдан біршама уақыт бұрын dalanews.kz сайтында «Байбек мырза, Мақатаев көшесінде «На Пастера» кәуапханасы қайдан жүр?» деп мақала жазған едік. Арада біршама уақыт өткеннен кейін кәуапхананың маңдайшаындағы жазу жоғалды.

Байбек мырза, Мақатаев көшесінде «На Пастера» кәуапханасы қайдан жүр?

Сол кезде қала әкімі біздің ой-пікірімізге назар аударып, бұл мәселені реттеген екен деп қуанышымыз қойнымызға сыймай «Бауыржан Байбекке Мұқағалидың әруағы риза болған шығар?» деп бір мақала жазып тастаған едік.

Жыл басында осылай болған

Өкінішке орай, қуанышымыз ұзаққа созылмады. Арада бір ай өткеннен кейін Мақатаев көшесімен (Пастер көшесімен шатастырмаңыздар) кетіп бара жатқанымызда кәуапхана қожайындар «На Пастера» деген жазуды бұрынғыдан да үлкейтіп, алты шақырым жерден анық көретіндей жазып қойғанын көргенде біз көтерген мәселеге қала басшысы мүлде назар аудармағанын біліп, алып ұшқан көңіліміз су сепкендей басылды.

Мақатаев көшесінің бойында «На Пастера» деп кәуапхана ашқан адам үшін Қазақстанның тәуелсіздігінің бес тиындық қадірі жоқ екенін білеміз. Егер кәсіпкер елімізді, Тәуелсіздігімізді сыйласа өзінің кәуапханасын Кеңес замандағы көшенің атымен атамас еді.

Кәуапхананың маңдайшасындағы қазіргі жазу

Ал осындай оспадарлыққа жол беріп қойған қала Алматы қаласы әкімдігінің ұзын арқан, кең тұсауға салынып, бей-жай отыруын қалай түсінуге болады?

Қаланың ішінде осындай өрескел қателіктер көбейіп тұрғанда тау-тастағы фашистік белгіні қала билігі назарға алып, өшіреді дегенге сенбеймін.

Альпинист Артем Скопин КТК арнасына берген түсініктемесінде мұндай белгілердің пайда болғанына 6-7 жыл болғанын алға тартыпты.Алғашында біреудің ермегі шығар деп мән бермеген. Кейін келе осы бір көріністі жиі кездестіре бастапты. Енді міне соңғы жылдары тіпті тау басындағы мұздыққа дейін қаптап кеткенін айтып отыр.

КТК арнасынан алынған скриншот

– Жүріп келе жатып басыңды көтерсең көзіңе бірден осы бір сурет түседі. Мұны «Шағын Алматы» шатқалында ғана емес, қала маңындағы барлық таулардан кездестіруге болады. Шетелден келген туристерден ұят. Сондықтан бұзақыларды ұстауға қоғам болып атсалысқан жөн. Салып жатқан адамды ұстауға қаншама рет тырыстық. Бірақ түк шықпады, – дейді Алматы қалалық альпинизм федерациясының президенті Артем Скопин.

Алматының табиғаты мен тауларын тамашалауға келген туристер де соңғы кезде фашистік белгіні жиі кездестіріп жүргендеріне қапалы. Қанша елге бардық, бірақ дәл осындай сорақы суретті көрмегендерін айтады.

Ал полициядағылар бұл әрекеттің ұсақ бұзақылыққа жататынын айтты. Жазасы тек айыппұлмен шектеледі. Бірақ бұл дерек бойынша ішкі істер органдарына ешқандай шағым түспепті.

Еліміз үшін маңызды, іргелі қалада осындай көңілге кірбің түсіретін жайттардың көбеюі халқытың әкімдікке деген ренішін туғызатыны анық. Сондықтан бұл мәселені өрістетпей Бауыржан Байбек мырзаның тез арада шешкенін қалаймыз.

Бауыржан Байбекке Мұқағалидың әруағы риза болған шығар?

Нұрлан ЖҰМАХАН  

Добавить комментарий

Ваш e-mail не будет опубликован. Обязательные поля помечены *