Jeltoqsan aıynda Qazaqstanda mıllıardtaǵan teńge kólemindegi qarajatty qamtyǵan birqatar iri qarjylyq qylmystar áshkerelendi, dep habarlaıdy Dalanews.kz.
Finnews.kz derekterine súıensek, bir aı ishinde anyqtalǵan keıbir ister boıynsha shyǵyn kólemi júzdegen mıllıard teńgege jetken.
Onlaın-kazıno arqyly transshekaralyq aýdarymdar
Tergeý barysynda 600 mlrd teńgeden astam qarajattyń zańsyz onlaın-kazıno paıdasyna aýdarylǵany anyqtaldy. Quqyq qorǵaý organdary «drop» jelisin áshkerelep, aqsha bank shottary men «krıptokoshelekter» arqyly elden shyǵarylǵanyn habarlady.
«Qyran» turǵyn úı kesheni (Astana)
Bul is boıynsha 7,9 mlrd teńgeden astam qarajattyń zańsyz tartylǵany belgili boldy. Tergeý derekterine sáıkes, azamattarǵa baspana «naryqtan tómen baǵamen» usynylǵanymen, kelisimder menshik quqyǵyn bermeıtin brondaý jáne zadatok túrinde rásimdelgen.
Áleýmettik turǵyn úı salasyndaǵy shema
Astanada áleýmettik turǵyn úıge qatysty is boıynsha 2,3 mlrd teńgeden astam qarajatty zańsyz ıemdený faktileri anyqtalǵan. Shema jalǵan qujattardy paıdalaný arqyly júzege asqan. Qazirgi tańda tergeý jalǵasyp jatyr.
Dala SK Construction / Irtysh Riverside jobasy
Atalǵan qurylys jobasy aıasynda 1 mlrd teńgeden astam úlesker qarajaty zańsyz tartylǵan. Tergeý materıaldaryna sáıkes, aqsha tıisti qujattarsyz jınalǵan. İs boıynsha uıymdastyrýshy qamaýǵa alynǵan.
Kóshe jaryǵyn jańartý (Óskemen, Semeı)
Óskemen men Semeı qalalarynda kóshe jaryǵyn jańartý jobasy kezinde 320 mln teńge kóleminde zalal keltirilgen. Tergeý derekterine sáıkes, jabdyqtar men oryndalǵan jumystardyń quny qoldan ósirilgen. Úsh kúdiktige qatysty 7 jylǵa deıin bas bostandyǵynan aıyrý jazasy qarastyrylyp otyr.
Medısınalyq jabdyqtardy satyp alý
Medısınalyq jabdyqtardy satyp alý kezinde 115 mln teńge kólemindegi qarjyny jymqyrý faktisi tirkelgen. Satyp alýlardy jasandy túrde bólshekteý jáne affılırlengen kompanıalar arqyly baǵany kóterý faktileri anyqtalǵan. Burynǵy bas dárigerge qatysty bultartpaý sharasy retinde kepil qoldanylǵan.
