Memleket basshysy Qasym-Jomart Toqaev qazaqstandyqtardy Naýryz meıramymen quttyqtady, dep habarlaıdy Dalanews.kz
"Barshańyzdy Ulystyń uly kúni – áz-Naýryz meıramymen shyn júrekten quttyqtaımyn! Áz-Naýryz – tazarý, jańarý ýaqyty. Tazalyq – mán-maǵynasy keń uǵym. Bul – eń aldymen, oı tazalyǵy, sana men nıet tazalyǵy degen sóz", - dedi Prezıdent.
Memleket basshysy eki jyl buryn elimizde «Taza Qazaqstan» jalpyulttyq aksıasy bastaý alǵanyn eske saldy.
"Aýqymdy joba halyqtyń, ásirese, jastardyń jappaı qoldaýyna ıe boldy. Azamattarymyz tazalyqty qur sózben emes, naqty isimen kórsetýde. Uqyptylyq, jınaqylyq, tıanaqtylyq qasıetteri ultymyzdyń jańa sapasyna aınala bastady.
Jalpy, «Taza Qazaqstan» bastamasy – jaı ǵana kezekti saıası naýqan nemese úgit-nasıhat emes, bul – memleketimizdiń myzǵymas ıdeologıasy. Sondyqtan osy ıgi ispen biz jyl boıy aınalysýymyz kerek, bul ult bolmysynyń ajyramas bóligi bolýǵa tıis. Ásirese, Ulystyń uly kúni tazalyq fılosofıasyn keńinen dáripteý mańyzdy", - dedi ol.
Prezıdent qazir Qazaqstanda túbegeıli ózgerister kezeńi bastalǵanyn aıtty.
"Bárimiz bir el bolyp Konstıtýsıalyq reformany tabysty júzege asyrdyq. Bul reformanyń tarıhı mán-maǵynasy erekshe. Onyń el damýyna tıgizetin yqpaly asa kúshti bolaryna kúmán joq.
Jańa Konstıtýsıa, eń aldymen, óskeleń urpaqtyń ıgiligi úshin qabyldandy, bul jastarǵa arnalǵan qujat desek, qate bolmaıdy. Elimizge jany ashıtyn, ıaǵnı shyn máninde janashyr urpaq qana Qazaqstannyń kórkeıýine mol úles qosa alady. Elimizdiń keleshegi – otanshyl, jasampaz, jaýapkershiligi mol jastardyń qolynda.
Biz eshqandaı kedergi men qıyndyqqa qaramaı, elimizdi órkenıet jolyna shyǵarýymyz kerek. Halqymyzdyń tarıhı taǵdyry – ózimizdiń qolymyzda.
Qazaqstannan basqa Otanymyz joq. Shyndyqty aıtsaq, Qazaqstannyń damýy men órleýi bizden basqa eshkimge kerek joq. Sondyqtan qazirgi urpaq Otanymyzdyń baıandy bolashaǵy úshin barlyq jaǵdaıdy jasaýy kerek.
Bárimiz bir ult bolyp, bir el bolyp osy uly tarıhı joryqta mindetti túrde jeńiske jetýimiz qajet. Bul – bizdiń eń basty mindetimiz, mısıamyz", - dedi Toqaev.
Toqaev qazaqstandyqtarǵa amandyq pen tynyshtyq tiledi.
"Ulystyń uly kúni Jer Ana da, elimiz de jańaryp jatqan osy tarıhı sátte aıtylǵan tilektiń mán-maǵynasy aıryqsha dep oılaımyn. Sondyqtan eń bastysy elimizge amandyq, jerimizge tynyshtyq tileımin. Qasıetti Otanymyz – Qazaqstan Respýblıkasy máńgi jasasyn! Ata zańymyz óz tuǵyrynan túspesin! Týymyz bıikte jelbiresin! Ulys oń bolsyn, aq mol bolsyn! Elimizdiń tórt qubylasy túgel bolsyn", - dedi Memleket basshysy.
