Jetisý oblysynda Naýryz meıramy keń kólemde atalyp ótildi. Merekelik sharalar óńirdiń barlyq aýdan-qalalaryn qamtydy. Taldyqorǵan qalasyndaǵy merekede Konstıtýsıa aýyly men bıyl mereıtoılyq jyly atalyp ótiletin tarıhı tulǵalarǵa arnalǵan kıiz úıler sap túzdi. Taǵy bir atap óterlik ereksheligi sol, sıfrlyq kıiz úı qurylyp, zamanaýı tehnologıalyq alańda taldyqorǵandyqtar men qala qonaqtary óńirde júzege asyrylyp jatqan sıfrlyq jobalarmen, jańa sheshimdermen tanysty, dep habarlaıdy Dalanews.kz

Jetisý oblystyq ákimdigi baspasóz qyzmetiniń málimetinshe kelýshilerdi merekemen jasandy ıntellekt arqyly adammen naqty ýaqyt rejıminde baılanys ornata alatyn zamanaýı gýmanoıd robot quttyqtady. Sonymen qatar robot Qara jorǵa bıin bılep, tamashalaýshylarǵa erekshe kóńil kúı syılady. Taǵy bir jańashyldyqty atap ótsek, osy kúni dron arqyly baýyrsaq jetkizildi.

Taldyqorǵan qalasynda «Jastar» saıabaǵy mańynda «Naýryz aýyly» atty ulttyq naqyshtaǵy kıiz úıler qalashyǵy boı kóterdi. «Qosh keldiń, qutty Naýryzym» atty merekelik sharaǵa Jetisý oblysynyń ákimi Beıbit Isabaev qatysty.

Árbir kıiz úıdiń janynda qazaq halqynyń salt-dástúri men mádenıetin dáripteıtin shaǵyn sahnalyq kórinister uıymdastyryldy. Turǵyndar án aıtyp, bı bılep, ulttyq kıimderin kórsetip, túrli oıyndar men saıystarǵa qatysty. Sonymen qatar altybaqan quryldy qonaqtarǵa Naýryz kóje men baýyrsaq usynyldy.

«Mádenıet», «Bilim jáne ǵylym», «Inovasıa» kıiz úıleriniń basyn bosqan «Ata Zań aýylyn» kópshilik qyzyǵa tamashalady.

«Inovasıa» kıiz úıinde kelýshilerdi zamanaýı gýmanoıd robot qarsy alyp, Naýryz meıramy merekesimen quttyqtady. Robot sózdi uǵý, keńistikte baǵdarlaný, tepe-teńdik saqtaý, qozǵalysty úılestirý, qorshaǵan ortaǵa beıimdelý múmkindikterin kórsetti. Ol jasandy ıntellekt tehnologıalary arqyly adamdarmen erkin baılanys ornatty. Oǵan qosa robottalǵan sheshimder,  sol qatarda robot-ıt te tanystyryldy. Bul qurylǵy patrúldeý, nysandardy tekserý, adamdardy súıemeldeý sıaqty mindetterdi atqara alady jáne adam úshin qıyn nemese qaýipti jaǵdaılarda tıimdi jumys isteýge beıimdelgen.

3D LED-ekranda usynylǵan vızýaldy kontent zamanaýı sıfrlyq tehnologıalardyń qaýipsizdik, kólik, memlekettik qyzmetter men baılanys salalaryndaǵy kúndelikti ómirdi qalaı jeńildetetinin aıqyn kórsetti.

Alań qonaqtaryna Starlink spýtnıktik ınternetiniń múmkindikteri tanystyrylyp, ınternet jyldamdyǵy men turaqtylyǵy kórsetildi. Tanystyrylym sońynda dronnyń kómegimen baýyrsaq jetkizý kórinisi usynyldy.

Sıfrlyq kıiz úıdiń janynda balalar tehnologıany erte jastan meńgeretin robototehnıkaǵa arnalǵan zamanaýı aýyl beınesindegi ınteraktıvti alań uıymdastyryldy.

«Bilim men ǵylym» kıiz úıinde kelýshilerge tanymdyq ári ınteraktıvti tájirıbe kórsetildi. Atap aıtqanda, munda aqparattyq kıoskiler, sıfrlyq sıfrovoı 3D prınter men robot-sportshylar tanystyryldy. Sondaı-aq adam men robot-shahmatshy arasyndaǵy shahmat oıyny da kópshiliktiń qyzyǵýshylyǵyn týǵyzdy.

«Mádenıet» kıiz úıinde Kórkemsýret galereıasy qoryndaǵy ulttyq naqyshtaǵy sýretter qoıylyp, búl kartınalar QR-kod arqyly JI kómegimen jandandyrylyp, qozǵalysqa keltirildi. Sol sıaqty bıyl mereıtoılary atap ótiletin tarıhı tulǵalardyń ómiri men qyzmeti týraly rolık kórsetildi.

Sonymen birge Ybyraı Altynsarınniń 185, Jambyl Jabaevtyń 180, Barlyq Syrttanovtyń 160. Nurmolda Aldabergenovtiń 120, Dánesh Raqyshev pen Ábiken Sarybaevtyń 100 jyldyqtaryna t.b. tarıhı tulǵalarǵa arnalǵan kıiz úıler quryldy.

Oqýshylar saraıynyń tárbıelenýshi ónerli balalary merekelik konsert usyndy. Sondaı-aq balalardyń qolynan shyqqan túrli buıymdar kórmege qoıyldy.  

Saıabaq mańyndaǵy sport alańdarynda ulttyq sport túrlerinen jarystar ótti. Sonymen qatar Taldyqorǵan qalasynda palýandar «Taldyqorǵan barysy» fınaldyq saıysynda qazaq kúresinen baq synasty.

Sol sıaqty «Visit Zhetysu» týrısik aqparattyq ortalyǵy uıymdastyrǵan kórmede óńirdiń týrısik múmkindikteri men damý perspektıvalary tanystyryldy. İs-shara óńirdiń shyǵarmashylyq ujymdary qatysqan Naýryz meıramynyń máni men mańyzyn ashatyn teatrlandyrylǵan qoıylymmen jalǵasyn tapty.

Saltanatty sharada Jetisý oblysynyń ákimi Beıbit Isabaev turǵyndardy merekemen quttyqtady:

- Naýryz – jańarýdyń alǵysharty, jańǵyrýdyń basy, birlik pen kelisimniń jarshysy. Nuryn shashqan Naýryzben birge qaıyrymdylyq, janashyrlyq, tileýlestik, qorshaǵan ortaǵa jáne adamdardyń bir-birine degen qamqorlyǵy sıaqty barsha asyl qasıetter eselene túsedi. Úlkenge qurmet, kishige izet, qoǵamǵa eńbek, elge qyzmet etýdiń úlgisi pash etiledi. Mundaı ıgi sharalar Naýryzda ǵana emes, jyl boıy úzdiksiz jalǵasatyn qasterli qundylyqtarymyzǵa aınalýy tıis. Áz-Naýryz ár shańyraqqa qýanysh pen shattyq, yrys pen baq ákelsin, - dedi óńir basshysy.

Merekelik shara «Naýryz shashýy» atty konsertpen qorytyndylandy.

Naýryzǵa Tekeli qalasynan kelgen búrkitshi Jasulan Búrkitbaı óz pikirin bildirdi:

– Meniń ákem Faızýlla Búrkitbaı qazaq halqynyń eń kóne ónerleriniń biri – qusbegilikpen aınalysady. Bul – tabıǵatqa degen tereń qurmetti, meıirimdilikti, tózimdilik pen sheberlikti talap etetin biregeı dástúr. Ákemiz – bizge barlyq jaǵynan ustaz. Nemereleri de onyń isin jalǵastyryp keledi. Ótken jyldyń kúzinde «Qyran» respýblıkalyq baıqaýynda bizdiń búrkitter bas júldeni jeńip aldy. Búgin biz eki búrkit pen bir qarshyǵamyzdy Naýryz merekesine oraı uıymdastyrylǵan kórmege alyp keldik. Ózim qusbegilikten oblysta jattyqtyrýshymyn, jas urpaqtyń boıyna ulttyq sport túrlerine degen súıispenshilik pen qyzyǵýshylyqty darytýǵa tyrysamyn. Búrkitti qolǵa úıretý ońaı emes, ol – rýhy myqty qus, sondyqtan ony kúshpen baǵyndyrý múmkin emes. Bul jerde sabyr kerek, tózim kerek. Men jastardy osyǵan úıretýge tyrysamyn, – dedi ol.

Jergilikti turǵyn Andreı Chýhan da oı qosty:

– Naýryz – bul bizdiń jalpyulttyq merekemiz. Jyl saıyn osy meıramǵa arnalǵan is-sharalarǵa qalmaı, únemi qatysamyn. Óıtkeni bul mereke kóktemniń kelgenin bildiredi, tabıǵat oıanyp, kún uzaryp, jylylyq molaıady. Bizdiń tatýlyǵymyzdy, beıbitshiligimiz ben birligimizdi pash etedi, bul – bizdiń ortaq baılyǵymyz. Biz jyl saıyn kóktemdi birge, tatý-tátti, kóńildi qarsy alamyz, elimizdiń mádenı murasy men dástúrlerin kórip bilip, tanı túsemiz. Barshańyzǵa zor densaýlyq, úılerińizge molshylyq tileımin, – dedi ol.

Jalpy mereke keshkilik baǵdarlamamen jalǵasyp, konsert pen otshashý bolady dep josparlanǵan.

Atap ótsek, Jetisý oblysynda Naýryz merekesi aıasynda 1330-dan astam túrli is-shara men aksıalar uıymdastyryldy.