Qazaqstan mektepterinde memleket esebinen beriletin tegin ystyq tamaqtyń basym bóligi qoqysqa ketip jatyr. Bul týraly jýrnalıs Rıshat Asqarbekuly aıtyp, dabyl qaqty, dep habarlaıdy Dalanews.kz.
Onyń aıtýynsha, ashanalarda daıyndalatyn taǵamnyń 80–90 paıyzy jelinbeı, tipti malǵa berilip otyr. Iaǵnı búdjetten bólingen qarjy naqty balaǵa emes, ysyrapqa jumsalýda.
Jýrnalıs bul jaǵdaıdy ashyq absýrd dep baǵalaıdy. Onyń pikirinshe, "Taǵamtaný akademıasy bekitken rasıon" degen syltaýmen balalar jeýge jaramsyz, dámsiz ári sapasyz tamaq berilip otyr.
Normatıv bar, biraq nátıje joq
Qazaqstanda mekteptegi tamaqtaný júıesi qaǵaz júzinde rettelgen. Rasıondy Taǵamtaný akademıasy bekitedi, kalorıasy, quramy, vıtamın mólsheri esepteledi. Biraq is júzinde bul normalar balanyń naqty talǵamy men fızıologıasyna saı kele bermeıdi.
Rıshat Asqarbekuly balalarǵa beriletin as kóbine sýdaı kompot, pispegen qyryqqabat, sýyq tamaq túrinde usynylatynyn atap ótti. Mundaı taǵamdy eresek adamnyń ózi zorǵa jese, bastaýysh jáne orta synyptaǵy balalardyń jemeı qoıýy zańdy.
Iaǵnı problema tek normatıvada emes, ony qalaı oryndap jatqanynda.
Rıshat Asqarbekulynyń sózinshe, mektepterde tamaqtandyrý qyzmeti tender arqyly beriledi. Bul júıeni bári biledi, biraq eshkim ashyq aıtpaıdy:
Kásipker úshin bastysy – tenderdi utyp alý. Mektep dırektory úshin – eseptiń durys jabylýy. Al memleket aqshasy jelinbegen tamaqpen birge qoqysqa ketip jatyr.
Bul jerde sapa emes, "qarjy ıgerý" basty maqsatqa aınalǵan.
Resmı esepte bir bala kúnine belgili bir somaǵa tamaq ishken bolyp sanalady. Biraq bala ony jemese de, aqsha báribir esepten shyǵady. Bul – jasyryn ysyraptyń eń qaýipti túri.
Eger rasymen taǵamnyń 80–90 paıyzy jelinbese, onda bul mıllıardtaǵan teńge tıimsiz jumsalyp jatyr degen sóz.
Depýtattar nege únsiz?
Jýrnalıs "Qashan túbegeıli sheshim qabyldaısyzdar?" dep depýtattarǵa tikeleı suraq qoıdy.
"Kórip, kúlip, jyltyrap ketkennen ne paıda, Ekaterına Smolákova? Al endi ony kóterip, bir úlken betburys jasaý kerek nemese dámdi, ádemi qylyp jasasa – bala jemeı me?!", - deıdi jýrnalıs.
