Qazaqstanda jeke medısınalyq uıymdarǵa júrgizilgen keshendi tekserýler nátıjesinde shamamen 400 mekeme óz qyzmetin toqtatty, dep habarlaıdy Dala News.
Densaýlyq saqtaý mınıstrliginiń Medısınalyq jáne farmasevtıkalyq baqylaý komıteti 2025 jyly jeke sektordaǵy medısınalyq uıymdarǵa baqylaýdy kúsheıtken. Nátıjesinde el boıynsha 500-den astam ákimshilik shara qoldanylyp, salynǵan aıyppul kólemi 70 mln teńgeden asty.
Tekserýler barysynda lısenzıasyz qyzmet kórsetý, biliktilik talaptarynyń saqtalmaýy jáne medısınalyq kómek standarttarynyń óreskel buzylýy jıi anyqtalǵan. Alǵash ret qadaǵalaý tájirıbesinde jedel áreket etý tetikteri qoldanylyp, keıbir uıymdardyń qyzmeti ýaqytsha toqtatylyp, medısınalyq qyzmetkerler jumysynan shettetildi.
Negizgi nazar jeke prosedýralyq kabınetterge, narkologıalyq ońaltý ortalyqtaryna jáne stomatologıalyq klınıkalarǵa aýdarylǵan. El boıynsha 1900-den astam prosedýralyq kabınet anyqtalyp, olardyń 406-sy lısenzıasyz jumys istegeni belgili boldy. Túsindirý jumystarynyń nátıjesinde 247 kabınet óz erkimen jabylǵan.
Sondaı-aq 39 jeke narkologıalyq jáne ońaltý ortalyǵy tekserilip, olardyń 14-inde lısenzıa múlde bolmaǵan. Al 313 stomatologıalyq klınıkanyń 143-i tekserýden keıin qyzmetin toqtatýǵa májbúr bolǵan.
Eń jıi kezdesken zańbuzýshylyqtar qatarynda lısenzıasyz medısınalyq qyzmet, farmasevtıkalyq erejelerdiń saqtalmaýy, kadrlardyń talapqa saı kelmeýi, tirkelmegen dárilik zattar men medısınalyq buıymdardy qoldaný bar.
Mınıstrlik 2026 jyldan bastap jeke medısınaǵa baqylaýdy odan ári kúsheıtýdi josparlap otyr. Atap aıtqanda, lısenzıalardyń bes jyldyq merzimmen berilýi, qaıta baǵalaý tetigin engizý, postlısenzıalyq baqylaýdy sıfrlandyrý jáne jasandy ıntellekt elementteri bar táýekelderdi basqarý júıesin iske qosý kózdelgen.
Vedomstvo qazaqstandyqtardy medısınalyq qyzmet alar aldynda mekemeniń lısenzıasy men mamandardyń biliktiligin tekserýge shaqyrady. Zańbuzýshylyq anyqtalǵan jaǵdaıda azamattar E-otinish platformasy arqyly tıisti organǵa shaǵym túsire alady.
