Almaty turǵyny naǵashy atasynan muraǵa páter alǵan. Alaıda boıjetkenniń anasy bul sheshimge qarsy shyǵyp, ákesiniń psıhıkalyq jaǵdaıyn syltaý etken, dep habarlaıdy Dalanews.kz.

Joǵarǵy sot múlik daýyna qatysty jańa is qarady. İs materıaldaryna sáıkes, Almaty turǵyny qaıtys bolar aldynda jıen nemere qyzynyń atyna notarıýs arqyly ósıet jasap, páterin muraǵa qaldyrǵan. Degenmen atasynyń qyzy, ıaǵnı boıjetkenniń anasy bul sheshimge kelispeı, páterdi óz atyna jazýdy talap etken. Ol qyzyna qarsy aryzynda ákesiniń tiri kezinde ishimdikke táýeldi bolǵanyn, narkologıalyq dıspanserde esepte turǵanyn, alkogolızm saldarynan áreketteriniń mánin túsinbegenin málimdegen.

Birinshi satydaǵy sot psıhologıalyq saraptama qorytyndysyna súıenip, mura qaldyrǵan er adamnyń shyn máninde psıhologıalyq aýytqýy bar degen sheshim shyǵarǵan. Alaıda apelásıalyq satydaǵy sot bul qorytyndyny zańsyz dep tanydy: qujatta er adamnyń Astanada turǵany kórsetilgen, al táýelsiz sarapshylar onyń tiri kezinde psıhıatr men narkologtyń esepte turmaǵanyn dáleldedi. Osyǵan baılanysty sýdıa alǵashqy qorytyndy jasaǵan psıhıatrdyń lısenzıasyn joıyp, ony jaýapkershilikke tartý týraly sheshim qabyldady.

Sondaı-aq naǵashy atasynan mura retinde páter alǵan boıjetken 2014 jyldan beri atasymen birge turǵany rastalyp, páterdi ósıet boıynsha boıjetkenniń atyna qaldyrý týraly úkim shyǵaryldy.