Qazaqstan Germanıaǵa banknottar men baǵaly qaǵazdar eksporttaı bastady, dep habarlaıdy Dalanews.kz LS saıtyna silteme jasap.

2025 jyldyń qańtar–qazan aılarynda eki el arasyndaǵy taýar aınalymy 3,5 mlrd dollarǵa deıin qysqaryp, 2024 jyldyń osy kezeńimen salystyrǵanda 5,6%-ǵa azaıǵan.

Qazaqstannan Germanıaǵa jetkizilimder tabıǵı kólemde 18%-ǵa ósip, 1,6 mln tonnaǵa jetse, aqshalaı mánde 5%-ǵa artyp, 1 mlrd dollardy quraǵan.

Munaı eksporty 19,4%-ǵa ósip, 1,5 mln tonnaǵa jetti. Shıkizat ádettegideı eksporttyń negizgi úlesin alyp otyr.

Sondaı-aq feroqorytpalar jetkizilimi 37,9 myń tonnaǵa (+5%), aǵashtan jasalǵan palletter men júk tuǵyrlary 11,5 myń tonnaǵa (+3,2 ese), symdar men kabelder 648,8 tonnaǵa (+2,7 ese) artqan.

Dástúrli túrde jergilikti naryqtan Eýropa eline balyq fılesi tasymaldanatyn. Alaıda onyń kólemi 1,5 esege qysqaryp, 488,7 tonna boldy.

Al Germanıadan ımport boıynsha jaǵdaı ózgeshe qalyptasty. Tabıǵı kólemde ımport shamamen 11%-ǵa tómendep, 207,8 myń tonnaǵa jetse, aqshalaı kórsetkish kerisinshe 6%-ǵa ósip, 2,5 mlrd dollardy quraǵan.

Qazaqstan farmasevtıkalyq ónimderdi azyraq satyp alǵan – 1,5 myń tonna (-1,6 ese), sondaı-aq qurylysqa arnalǵan metal konstrýksıalarynyń ımporty da eki esege qysqaryp, 9,2 myń tonnany qurady.

Germanıadan ákelinetin tirkemeler men jartylaı tirkemelerdiń ımporty da 2,5%-ǵa azaıyp, 5,9 myń birlikti kórsetti.

Al aýyl sharýashylyǵy tehnıkasynyń jetkizilimi kerisinshe artqan – 984 birlik (+16,3%). Sonymen qatar jeńil avtokólikter, júk kólikteri men traktorlar ımporty 2,5%-ǵa ósip, 3,8 myń birlikke jetti.

Budan bólek, Qazaqstan kondısıonerler, sorǵylar men kompresorlardy 44,9 myń birlik kóleminde (+14,6%), metal óńdeýge jáne kesýge arnalǵan stanoktardy 323 birlik (+1,5 ese), elektr generatorlyq qondyrǵylardy 231 birlik (+6,4 ese) satyp alǵan.

Germanıadan aǵashtar men butalar ımporty kúrt ósip, 2,4 ese artyp 135,5 myń danaǵa jetse, jańa pisken kartop jetkizilimi 3,2 ese kóbeıip, 1,1 myń tonnany qurady.