«Dostyq» Qazaqstan–Pákistan sport ortalyǵy saltanatty túrde ashyldy. Bul shara QR Prezıdenti Qasym-Jomart Toqaevtyń Pákistanǵa memlekettik sapary aıasynda ótti, dep habarlaıdy Dalanews.kz.
2026 jylǵy 2–4 aqpan aralyǵynda Islamabad qalasynda Qazaqstan Respýblıkasy Týrızm jáne sport mınıstrliginiń jáne Qazaqstan Respýblıkasynyń Toǵyzqumalaq federasıasynyń ókilderi Pákistan Islam Respýblıkasyna jumys saparymen bardy. Sapar Pákistanǵa josparlanǵan memlekettik saparǵa daıyndyq aıasynda uıymdastyryldy.
Sapardyń negizgi maqsaty – Qazaqstan men Pákistan arasyndaǵy ıntellektýaldyq sport túrleri, onyń ishinde toǵyzqumalaqty halyqaralyq deńgeıde damytý, birlesken bilim berý jáne sporttyq jobalardy iske asyrý, sondaı-aq sporttyq dıplomatıany nyǵaıtý boldy.
Delegasıa quramy
Qazaqstan tarapynan saparǵa QR Týrızm jáne sport vıse-mınıstri Rapıkov Baýyrjan Serıkbaıuly , mınıstrlik ókilderi, Qazaqstan Respýblıkasynyń Toǵyzqumalaq federasıasynyń basshylyǵy men jetekshi sportshylary qatysty.
Delegasıa quramynda Dúnıejúzilik Toǵyzqumalaq federasıasynyń vıse-prezıdenti– QR Toǵyzqumalaq Federasıasynyń prezıdenti Ákim Tursun, toǵyzqumalaqtan 3 dúrkin Álem chempıony Serik Aqtaev, QR Toǵyzqumalaq federasıasynyń atqarýshy dırektory Azamat Qaldybaev jáne halyqaralyq dárejedegi sport sheberleri, ulttyq zıatkerlik sport túrin nasıhattaýshy mamandar boldy.
Negizgi is-sharalar
3 aqpan kúni Islamabad qalasyndaǵy Pakistan Sports Board bazasynda ornalasqan Qazaqstan–Pákistan «Dostyq» sport ortalyǵy saltanatty túrde ashyldy.
Ashylý rásiminde Qazaqstan Respýblıkasy men Pákistan Islam Respýblıkasynyń memlekettik ánurandary oryndaldy. Pákistannyń provınsıaaralyq úılestirý jónindegi federaldy hatshysy jáne QR Týrızm jáne sport vıse-mınıstri quttyqtaý sóz sóıledi. Osy jerde toǵyzqumalaq pen shahmat synyptarynyń resmı tanystyrylymy ótti. Qazaqstandyq mamandar toǵyzqumalaqtyń tarıhy, erejeleri jáne halyqaralyq damý perspektıvalary týraly baıandama jasady.
Sonymen qatar, Toǵyzqumalaqtan 3 dúrkin Álem chempıony Serik Aqtaev pákistandyq sportshylar men jattyqtyrýshylarǵa arnap sheberlik sabaǵyn ótkizdi. Sabaq barysynda oıynnyń strategıalyq erekshelikteri, oqý-jattyǵý ádistemeleri jáne halyqaralyq jarystarǵa daıyndyq tájirıbesimen bólisti.
Qujattarǵa qol qoıý
Sapar barysynda ıntellektýaldyq jáne ulttyq sport túrlerin damytýǵa baǵyttalǵan kelesi mańyzdy qujattarǵa qol qoıyldy.
Qazaqstan–Pákistan «Dostyq» sport ortalyǵyn qurý týraly memorandým túzildi. Qazaqstan men Pákistan arasyndaǵy 2026 jylǵa arnalǵan sporttyq is-sharalar jol kartasy, onyń ishinde toǵyzqumalaq boıynsha birlesken týrnırler men oqý semınarlaryn ótkizý kelisildi. Toǵyzqumalaqty Pákistan aýmaǵynda damytýǵa baǵyttalǵan yntymaqtastyq jónindegi ýaǵdalastyqtar jasaldy.
Mádenı baǵdarlama
Resmı is-sharalarmen qatar, delegasıa Islamabad qalasyndaǵy «Lok Vırsa» halyqtyq mura mýzeıin jáne Pákistan monýmentin aralady. Pákistandyq áriptester tarapynan resmı qabyldaýlar men jumys kezdesýleri uıymdastyryldy.
Sapardyń mańyzy
Bul sapar Qazaqstan men Pákistan arasyndaǵy dostyq qarym-qatynasty nyǵaıtyp qana qoımaı, toǵyzqumalaqty halyqaralyq deńgeıde ilgeriletýge, birlesken oqý-jattyǵý jıyndaryn, týrnırler men bilim berý baǵdarlamalaryn ótkizýge jańa múmkindikter ashty.
Qazaqstan Respýblıkasynyń Toǵyzqumalaq federasıasy úshin bul sapar ulttyq zıatkerlik sport túrin Ońtústik Azıa aımaǵynda tanytý jolyndaǵy mańyzdy qadam boldy.
