Qazaqstandyq óndirýshiler úshin Mońǵolıa naryǵyna shyǵý aıtarlyqtaı jeńildedi, dep habarlaıdy Dala News.
Májilis EAEO men Mońǵolıa arasyndaǵy ýaqytsha saýda kelisimin ratıfıkasıalady, bul qujat Qazaqstan úshin eksport geografıasyn keńeıtýge, azyq-túlik qaýipsizdigin kúsheıtýge jáne óńirlik ekonomıkalyq yqpaldy arttyrýǵa baǵyttalǵan mańyzdy qadam sanalady.
Májilis depýtaty Nurgúl Taý kelisimniń strategıalyq sıpatyna toqtaldy. Onyń aıtýynsha, Mońǵolıa Qazaqstan úshin tek kórshi memleket emes, Azıa baǵytyndaǵy senimdi ekonomıkalyq seriktes.
Kelisim qazaqstandyq taýarlarǵa Mońǵolıa naryǵynda kedendik jeńildikter beredi. Endi otandyq óndirýshiler bıdaı, arpa, júgeri, un, makaron jáne kondıterlik ónimderdi baj salyǵynsyz eksporttaı alady. Buǵan deıin bul taýarlar qosymsha kedendik tólemderge ushyrap kelgen.
Depýtattyń sózinshe, kelisim tek saýda kólemin ulǵaıtyp qoımaı, qosylǵan quny joǵary ónimderge negizdelgen jańa ekonomıkalyq tizbekterdi qalyptastyrýǵa múmkindik beredi. Bul Qazaqstannyń shıkizatqa táýeldiligin azaıtyp, óńdeýshi sektordyń damýyna serpin beredi.
Saýda jáne ıntegrasıa mınıstriniń mindetin atqarýshy Janel Kýshakovanyń málimetinshe, qujat EAEO elderi men Mońǵolıa arasynda 367 taýar pozısıasy boıynsha ımporttyq bajdardy alyp tastaýdy kózdeıdi. Kelisim úsh jylǵa jasalyp, taraptardyń kelisimimen avtomatty túrde taǵy úsh jylǵa uzartylýy múmkin.
Qujatta tehnıkalyq retteý, sanıtarlyq jáne fıtosanıtarlyq talaptar, kedendik yntymaqtastyq jáne ishki naryqty qorǵaý tetikteri de qamtylǵan. Mınıstrlik ókilderi kelisimdi iske asyrý respýblıkalyq búdjetke qosymsha salmaq salmaıtynyn atap ótti.
Sarapshylardyń pikirinshe, bul sheshim Qazaqstannyń Mońǵolıadaǵy pozısıasyn kúsheıtip qana qoımaı, eldiń azyq-túlik eksportyn Azıa naryqtaryna júıeli túrde shyǵarýǵa jol ashady. Aldaǵy kezeńde eki el arasyndaǵy taýar aınalymyn 500 mln dollarǵa deıin arttyrý kózdelip otyr.
