Qazaqstanda jasyryn baqylaýǵa arnalǵan qurylǵylardy satýǵa mindetti sertıfıkattaý men lısenzıalaý engizý usynyldy. Bul bastamany Májilis depýtaty Ábýtálip Mútáli kóterip, shaǵyn-kameralar, dıktofondar, GPS-trekerler men GSM-maıaktar naryǵy is júzinde jetkilikti deńgeıde rettelmeı otyrǵanyn atap ótti, dep habarlaıdy Dalanews.kz.
Depýtattyń aıtýynsha, mundaı qurylǵylar zańsyz baqylaý júrgizý úshin paıdalanylyp, azamattardyń jeke ómirine qol suǵýǵa ákelýi múmkin. Sonymen qatar olar jeke derekterdi zańsyz jınaý, bopsalaý jáne qýdalaý táýekelderin arttyrady.
Mútáli qazirgi zamanǵy avtokólikterge de erekshe alańdaýshylyq bildirdi. Onyń sózinshe, sheteldik serverlerge qosylǵan júıeler paıdalanýshylardyń qozǵalysy men belsendiligin baqylaýǵa múmkindik berýi yqtımal, bul derekter qaýipsizdigine qatysty qosymsha qaýip týdyrady.
Máseleni sheshý úshin depýtat jasyryn baqylaý qurylǵylarynyń aınalymyna memlekettik baqylaýdy kúsheıtýdi, tıisti memlekettik organdardy tartýdy jáne qoldanystaǵy zańnama aıasynda azamattardyń jeke derekterin qorǵaýdy qamtamasyz etýdi usyndy.
