Májilis depýtaty Marhabat Jaıymbetov elde kóleńkeli saýda men jalǵan taýarlardyń kóbeıýine alańdaýshylyq bildirdi. Ádilet mınıstrliginiń deregine sáıkes, 2025 jyly tárkilengen ónim kólemi 10 ese artqan. Alaıda zańsyz naryqtyń naqty aýqymy budan da joǵary bolýy múmkin, dep habarlaıdy Dalanews.kz.
Depýtattyń aıtýynsha, eń aldymen taýardaǵy biregeı kodty skanerleý arqyly onyń túpnusqalyǵyn birden tekserýge múmkindik beretin arnaıy mobıldi qosymsha iske qosý qajet. Sonymen qatar kontrafakt ónim óndirý men ony elge zańsyz ımporttaǵany úshin qylmystyq jáne qarjylyq jaýapkershilikti kúsheıtý usynyldy. Budan bólek, belgili bir sanattaǵy taýarlardy tek óndirýshilerden tikeleı jetkiziletin rastalǵan jetkizý arnalary arqyly satýdy mindetteý kerek dep sanaıdy. Sondaı-aq ásirese Reseı men Qytaıdan keletin "sur ımportty" taldap, jalǵan ónimderdi ótkizý arnalarynyń biryńǵaı tizilimin jasaý usynyldy.
Marhabat Jaıymbetov búginde saýda oryndarynda jeke gıgıena quraldarynan bastap azyq-túlikke deıingi tanymal brendterdiń qoldan jasalǵan nusqalary kezdesetinin atap ótti. Onyń aıtýynsha, mundaı ónimder sanıtarlyq qorytyndysyz ákelinip, azamattardyń densaýlyǵyna qaýip tóndiredi.
