Qazaqstandyq Eurasia Agro Semey kompanıasy Kýveıtke et ónimderin eksporttaýǵa baǵyttalǵan mańyzdy kelisimderge qol jetkizdi, dep habarlaıdy Dala News.
Qazaqstan Respýblıkasynyń Kýveıt Memleketindegi Elshiliginiń qoldaýymen kompanıa ókilderi Kýveıtke jumys saparymen baryp, jergilikti iri agroónerkásiptik jáne saýda qurylymdarymen kelissózder júrgizdi.
Sapar aıasynda Eurasia Agro Semey men kýveıttik ALMARAI National Co. arasynda yntymaqtastyq týraly memorandýmǵa qol qoıyldy. Qujat 2026 jyldyń tamyz aıynda Semeıdegi et óńdeý kesheni iske qosylǵannan keıin qazaqstandyq et ónimderin Kýveıt naryǵyna jetkizýge nıetti ekenin bekitedi.
Bul kelisim Qazaqstan men Kýveıt arasyndaǵy saýda-ekonomıkalyq baılanystardy keńeıtip qana qoımaı, otandyq agroónerkásip ónimderiniń Taıaý Shyǵys naryǵyndaǵy ornyn nyǵaıtýǵa baǵyttalǵan.
Sonymen qatar qazaqstandyq kompanıa basshylyǵy Kýveıttegi azyq-túlik dıstrıbýsıasyndaǵy iri oıynshylardyń biri Al-Yasra saýda tobymen jáne eldegi eń iri sýpermarket jelileriniń qataryna kiretin The Sultan Center kompanıasymen kezdesýler ótkizdi. Kelissózder barysynda joǵary qosylǵan quny bar qazaqstandyq ónimderdi Kýveıt naryǵyna jetkizýdiń yqtımal formattary talqylandy.
Aıta keteıik, Eurasia Agro Semey jobasy keńes kezeńinde sala flagmany bolǵan Semeı qalasyndaǵy Kalının atyndaǵy et kombınaty ornalasqan aýmaqta júzege asyrylýda. Kompanıa óńirdiń óndiristik dástúrin saqtaı otyryp, halyqaralyq standarttarǵa saı zamanaýı, joǵary tehnologıaly et óńdeý keshenin salýda.
Joba tolyq iske qosylǵannan keıin Qazaqstannyń eksporttyq áleýetin arttyryp, otandyq et ónimderin jańa syrtqy naryqtarǵa júıeli túrde shyǵarýǵa múmkindik beredi.
