Qyzylorda oblysynyń ákimi áleýmettik jelilerde taraǵan, mektep muǵalimderin óńir basshysy týraly jazbalarǵa laık basyp, pikir qaldyrýǵa májbúrledi degen skrınshottarǵa qatysty pikir bildirdi, dep habarlaıdy Dalanews.kz.
Astanadaǵy Ortalyq komýnıkasıalar qyzmeti alańynda ótken brıfıń barysynda jýrnalıser Nurlybek Nálibaevke WhatsApp messendjerindegi hat-habar skrınshottary týraly suraq qoıdy. Onda habarlama avtorlary pedagogterden Qyzylorda oblysynyń ákimi týraly jarıalanymdarǵa 30 laık qoıyp, sonsha pikir jazý talap etilgenin alǵa tartqan.
Aımaq basshysy mundaı tapsyrmalardyń bolǵanyn joqqa shyǵardy.
"Mundaı tapsyrma bolǵan joq. Eger naqty dálelderińiz bolsa, joldańyzdar, men jaýap beremin. Qajet bolǵan jaǵdaıda bul derekti tekserý úshin quqyq qorǵaý organdaryna júginemiz. Bul aqparattyń qaıdan shyqqanyn bilmeımin. Bizge laık te, pikir de qajet emes. Biz tek óz jumysymyzdy atqaryp júrmiz", - dedi Qyzylorda oblysynyń ákimi.
Ákimdik ne sebepti aqparat jalǵan bolǵan jaǵdaıda tekseris bastamady degen saýalǵa jaýap bergen Nálibaev ınternette jarıalanymdardyń óte kóp ekenin atap ótip, bul máselege qatysty jazbasha túrde keńirek túsinikteme berýge daıyn ekenin aıtty.
"Jelide túrli aqparat kóp jarıalanady. Men ony esimde saqtamaımyn, bálkim, bul suraqqa buryn da jaýap bergen shyǵarmyn", - dedi aımaq basshysy.
