Májilis depýtaty Ermurat Bápı Konstıtýsıalyq reforma aıasynda qoǵamdy alańdańdatqan til máselesine qatysty pikir bildirdi, dep habarlaıdy Dalanews.kz.

"Jalpyhalyqtyq talqylaýǵa usynylǵan jańa Konstıtýsıa jobasynyń jalpy saıası sıpatyn salaýatty saralaı bilgen adam onyń mazmuny men maqsaty memlekettilikti, qaýipsizdigimiz ben táýelsizdiktiń turaqtylyǵyn kúıtteıtin astarly ısharany túsinse kerek-ti. Úles salmaǵy 70 paıyzdan asqan halyq óziniń tilin ózgege óktemdikpen emes, sary maıǵa ystyq qasyq batyrǵandaı baıyppen tańa bilý dál búgin áldeqaıda utymdy aıla bolar edi. Tildi teketires pen eregestiń qarýyna aınaldyrý bizge ábúıir ápermeıdi. Óziniń tilin óktemdikpen tyqpalaǵan ımansyz ıdeıalar paıda bolǵan zamanda esermen egesý estiniń isi bolmaıdy", - dedi depýtat búgin Májilis otyrysynda.

Artynsha Májilis dálizinde bul oıyn jalǵap, depýtat jýrnalıserge mynadaı túsinik berdi: "Mundaı máseleni beı-jaı qaldyra almaımyz. Osy Konstıtýsıalyq jobany talqylaý barysynda áldebir taqyryptardy ózimizdiń múmkindigimizden tys talqylap, óz qolymyzben eldiń ishinde tolqyn týdyrýdan abaı bolýymyz kerek".

Eske salaıyq, buǵan deıin Memlekettik keńesshi Erlan Qarın jańa Konstıtýsıa jobasynda qazaq tiline naqty ári aıryqsha mártebe berilgenin málimdedi.