Joǵary Sot Keńesi sot júıesindegi kadr saıasatyn qaıta qarap, sýdıalardy irikteý men taǵaıyndaý rásimderin jedeldetti, dep habarlaıdy Dala News.
Keńestiń kezekti otyrysynda komısıalar men Sot júrıiniń 2025 jylǵy jumysy qorytyndylanyp, sýdıa korpýsyn jańartýǵa baǵyttalǵan jańa tásilder tanystyryldy. Keńes tóraǵasy Dmıtrıı Malahov sýdıalyqqa úmitkerler sanyn arttyrý úshin buryn bolmaǵan qadamdarǵa barǵandaryn aıtty.
«Sot júıesine myqty zańgerlerdi tartý maqsatynda Keńes alǵash ret advokattar men zańgerler qaýymdastyqtary, sondaı-aq quqyq qorǵaý jáne arnaýly organdar qyzmetkerleri úshin onlaın-túsindirý semınarlaryn ótkizdi. Sonyń nátıjesinde irikteýge qatysýshylar sany ótken jylmen salystyrǵanda eki esege jýyq artty», - dedi Keńes tóraǵasy Dmıtrıı Malahov.
Onyń aıtýynsha, 2025 jyly sýdıalardy irikteý kezinde naqty salalarǵa – jer, korporatıvtik, salyq jáne qarjy quqyǵyna mamandanǵan zańgerlerge basymdyq berilgen. Bul sottaǵy kúrdeli isterdiń sapaly qaralýyna tikeleı áser etýi tıis.
Joǵary Sot Keńesi irikteý rásimderiniń ashyqtyǵyn kúsheıtýge de mán bergen. Taǵaıyndaýǵa usynylǵan kandıdattar týraly aqparat onlaın formatta jarıalanyp, qoǵamǵa qoljetimdi etilgen. Keńes bul qadamdy sot júıesine degen senimdi arttyrýǵa baǵyttalǵan sheshim retinde baǵalap otyr.
Sonymen qatar sýdıalyq biliktilik emtıhandarynyń tártibi qaıta qaralǵan. Emtıhandar júıeli túrde ótkizilip, barlyq kezeńderden ótý merzimi qysqartylǵan. Bul bir jaǵynan prosesti jedeldetse, ekinshi jaǵynan talaptardyń saqtalýyna qatysty suraqtar týyndatady.
Tártiptik praktıka boıynsha da ózgerister bar. Keńes málimetinshe, Sot ádilqazynyń sheshimderine shaǵymdar sany azaıǵan. Resmı derek muny sheshimderdiń birizdenýimen túsindiredi.
Joǵary Sot Keńesinde aldaǵy kezeńde de sýdıalardyń táýelsizdigi men sot júıesiniń ashyqtyǵyn kúsheıtý jumysy jalǵasatynyn málimdedi.
