2025 jyldyń qorytyndysy boıynsha Ulttyq qordyń aktıvteri 77,7 mıllıard dollardan asýy tıis. Bul týraly belgili sarapshy Aıbar Oljaev aıtty, dep habarlaıdy Dalanews.kz.
Onyń sózinshe, Qazaqstan tarıhynda Ulttyq qordaǵy aqsha mundaı mejege birinshi ret jetip otyr. Biz úshin buǵan deıin qordyń eń bıik núktege kóterilgeni 2014 jyl bolatyn. Sol ýaqytta, 11 jyl buryn Ulttyq qor 75,2 mıllıard dollarǵa deıin ósti.
"Biraq 2014 jylǵy krızıste Nazarbaev Úkimetke Ulttyq qordyń aqshasyn barynsha paıdalanýǵa pármen berdi de, sol ýaqyttan beri atqarýshy bılik transfertter arqyly qordy jyl saıyn julmalap keldi. Sonyń kesirinen tipti osy qor sarqylady degen qaýipter paıda bolǵany este. Sońǵy 10 jylda Ulttyq qordyń aıanyshty hali 2022 jyly tirkelgen edi. Pandemıa men postpandemıanyń búdjettik transfertteri ósip, qor aktıvteri 57,9 mıllıard dollarǵa deıin quldyrady. Biraq odan keıin qor birtindep óse bastady", - deıdi Oljaev.
Sarapshy 2024-2025 jylǵy Ulttyq qordyń jaqsy ósýine munaıdyń eshqandaı áseri bolmaǵanyn atap ótti.
"Tipti bul kezeńde munaı baǵasy barreline 72 dollardan 60 dollarǵa arzandap, munaıdan keletin aqsha azaıyp ketkenin aıtý kerek. Tabys pen jetistiktiń barlyǵy Ulttyq Banktiń qordyń aqshasyn durys ınvestısıalaýynan keldi. Biz ınvestısıalyq saıasatty ózgertip, kirisi tym az damyǵan elderdiń AAA kategorıaly oblıgasıalarynan kiristiligi kóbirek damýshy elderdiń sýverendi qaryzdary men aksıalar naryǵyna oıysa bastadyq. Sonyń arqasynda 2025 jyldyń 9 aıynda 12,6 mıllıard dollar ınvestısıalyq tabys taptyq. Bul munaı sektory ákelgen aqshadan keminde 40 paıyzǵa kóp", - deıdi sarapshy.
Aıbar Oljaev Ulttyq qor 2001 jyly qurylǵanyn, sol jyly oǵan eń alǵashqy aqsha – Shevron tólegen 600 mıllıon dollar salynǵanyn atap ótti.
"10 jyldan keıin, ıaǵnı 2011 jyly Qazaqstan Ulttyq qordyń qazynasyn 46 mıllıard dollarǵa deıin arttyrdy. Biraq taǵy 10 jyldan keıin - 2021 jyly qor aktıvteri 59,5 mıllıard dollarǵa áreń jetti. Iaǵnı osy 10 jyl merzim ishinde bar-joǵy 13-14 mıllıard dollarǵa ǵana óse aldy. Sebebi, 2014 jylǵy prezıdent sheshimi qordyń bolashaǵyn tumandy qylǵan edi. Sol jyldary qordan aǵylǵan transfertter halyqqa qyzmet etpedi. Olar FIIR degen túrli ótirik jobalar arqyly elıtanyń aqsha jymqyrýyna múmkindik berdi", - deıdi maman.
Oljaevtyń sózinshe, endi Ulttyq qordy eshkim sarqyp bitire almaıdy.
"Bıyl Ulttyq qordan alynatyn transfert 2,77 trıllıon teńgemen shekteldi. Mysaly, byltyr 5,25 trıllıon teńge alynǵan edi. Demek, aksıalar naryǵynda turaqtylyq saqtalsa, bıyl taǵy 13 mıllıard dollar qosa alamyz da, 2026 jyldyń sońynda Ulttyq qordy 90 mıllıard dollarǵa deıin toltyrýǵa myqty shans bar. Sol kúnge jeteıik", - deıdi sarapshy.
