Жаңаөзен қалалық сотында жүргізушіге қатысты ұсақ бұзақылық жасағаны үшін әкімшілік іс қаралды (ҚР ӘҚБтК-нің 434-бабының 1-бөлігі).

 

Оқиға былтыр 28 желтоқсанда Жаңаөзен қаласының Бостандық шағынауданында болған. Жүргізуші «Mersedes» маркалы автокөлікті басқарып келе жатып, жаяу жүргіншінің үстіне балшық шашып, қоғамдық орында айналасындағыларға сыйламаушылық бiлдiріп, қоғамдық тәртіпті және жеке тұлғалардың тыныштығын бұзатын құқық бұзушылық жасады.

 

Сот отырысында жүргізуші кінәсін мойындап, кешірім сұрайтынын, айыппұл түріндегі жазаны қолдануды сұрады.

 

Жүргізушінің кінәсі жәбірленушінің көрсетулерімен, әкімшілік құқық бұзушылық туралы хаттамамен, фотоматериалдармен және басқа да құжаттармен дәлелденді.

 

Сот қаулысымен көлік жүргізушісі ӘҚБтК-нің 434-бабының 1-бөлігінде көзделген әкімшілік құқық бұзушылық жасағаны үшін кінәлі деп танылып, оған 86500 теңге айыппұл салынды.

 

Қаулы заңды күшіне енген.