2026 جىل ەكونوميكا ءۇشىن وڭاي بولايىن دەپ تۇرعان جوق. حالىقارالىق ۆاليۋتا قورى (حۆق) بولجامىنا سايكەس، قوسىلعان قۇن سالىعى مەن كورپوراتيۆتىك سالىقتىڭ ءوسۋى، سونداي-اق تۇرعىن ۇي-كوممۋنالدىق شارۋاشىلىقتاعى تاريفتەردىڭ قىمباتتاۋى ينفلياسيانى 11%-عا دەيىن جەتكىزۋى مۇمكىن. الايدا ساراپشىلار مۇنى ۋاقىتشا قۇبىلىس دەپ باعالاپ وتىر، دەپ حابارلايدى Dalanews.kz Inbusiness-كە سىلتەمە جاساپ.
ينفلياسيا بىرتىندەپ تومەندەيدى
ساراپشىلاردىڭ پىكىرىنشە، قاتاڭداۋ اقشا-نەسيە ساياساتى ينفلياسيانىڭ تومەندەۋىنە مۇمكىندىك بەرەدى.
ەۋرازيالىق دامۋ بانكى (ەادب) مالىمەتىنشە، 2026 جىلدىڭ سوڭىنا قاراي ينفلياسيا دەڭگەيى 9،7%-عا دەيىن باياۋلاۋى ىقتيمال.
بۇل جاعداي سالىمشىلار ءۇشىن ماڭىزدى سيگنال بولىپ وتىر.
ۇلتتىق بانك بازالىق مولشەرلەمەنى جوعارى ۇستايدى
ينفلياسيا قىسىمىن تەجەۋ ءۇشىن قازاقستان رەسپۋبليكاسىنىڭ ۇلتتىق بانكى بازالىق مولشەرلەمەنى جوعارى دەڭگەيدە ساقتاۋعا ءماجبۇر بولادى. ال جوعارى مولشەرلەمە - تەڭگەدەگى دەپوزيتتەردىڭ ينفلياسيادان دا، ۇلتتىق ۆاليۋتانىڭ السىرەۋ قارقىنىنان دا جوعارى تابىس اكەلۋىنىڭ كەپىلى.
ياعني 2026 جىلى تەڭگەدەگى سالىمدار ناقتى تابىس اكەلەتىن قۇرال بولىپ قالا بەرەدى.
اقش-تاعى ساياسات قازاقستانعا قالاي اسەر ەتەدى؟
قازاقستاندا ۆاليۋتا باعامى تالقىلانىپ جاتقان تۇستا، اقش-تا اقشا-نەسيە ساياساتى تۇبەگەيلى وزگەرىپ جاتىر. اقش فەدەرالدى رەزەرۆ جۇيەسى 2025 جىلى بازالىق مولشەرلەمەنى ءۇش رەت تومەندەتىپ، 2026 جىلى تاعى ەكى رەت ازايتۋدى جوسپارلاپ وتىر.
بۇل دامۋشى ەلدەر، سونىڭ ىشىندە قازاقستان ءۇشىن قولايلى جاعداي قالىپتاستىرادى. اقش مەملەكەتتىك وبليگاسيالارىنىڭ كىرىستىلىگى تومەندەگەن سايىن، جاھاندىق ينۆەستورلار جوعارى تابىس ۇسىناتىن باسقا نارىقتاردى ىزدەي باستايدى.
ينۆەستورلار تەڭگەگە بەت بۇردى
مۇنداي جاعدايدا ينۆەستورلار پايىزدىق مولشەرلەمە ايىرماسىنان تابىس تابۋ ءۇشىن كاپيتالىن تەڭگەگە اۋدارادى. قازاقستان قارجىگەرلەر قاۋىمداستىعى دەرەگىنشە، وسى ءۇردىستىڭ اياسىندا قازاقستاننىڭ قور نارىعى 24،4%-عا ءوسىپ، ايتارلىقتاي ناتيجە كورسەتكەن.
دوللاردىڭ «جاسىرىن شىعىنى»
ساراپشىلار دوللاردى جيناق قۇرالى رەتىندە تاڭداۋدىڭ تاعى ءبىر كەمشىلىگىن اتاپ وتەدى. ايىرباستاۋ پۋنكتىندە دوللار ساتىپ العان ادام بىردەن 3–4% قارجىسىنان قاعىلادى. بۇل - ايىرباس باعامى مەن كوميسسيالاردان تۋىندايتىن شىعىن.
ياعني بۇگىن دوللار ساتىپ الىپ، كەم دەگەندە شىعىنسىز شىعۋ ءۇشىن تەڭگە ءدال وسى مولشەردە قۇنسىزدانۋى كەرەك. ال تەڭگەدەگى دەپوزيت كەرىسىنشە - العاشقى كۇننەن باستاپ تابىس اكەلە باستايدى جانە قوسىمشا كوميسسيا تالاپ ەتپەيدى.
قورىتىندى
ەادب، حۆق دەرەكتەرى مەن اقش فەدەرالدى رەزەرۆ جۇيەسىنىڭ ساياساتىن ەسكەرە وتىرىپ، ساراپشىلار 2026 جىلى تەڭگە جيناق ساقتاۋدىڭ ەڭ ۇتىمدى قۇرالى بولىپ قالا بەرەدى دەگەن قورىتىندىعا كەلىپ وتىر.
ال «جاستىق استىنداعى دوللار» كوبىنە الاڭداۋشىلىقتىڭ سيمۆولى رەتىندە قالىپ، قازىرگى ەكونوميكالىق جاعدايدا بانكتىك دەپوزيت پەن سالقىن ەسەپكە جول بەرەدى.
