جۋرناليستەر توقايەۆقا ۇندەۋ جولدادى: بوتاگوز وماروۆا ءىسىن باقىلاۋعا الۋدى جانە 274-باپتى دەكريميناليزاسيالاۋدى سۇرادى، دەپ حابارلايدى Dalanews.kz
قازاقستان جۋرناليستەرى پرەزيدەنت قاسىم-جومارت توقايەۆقا بوتاگوز وماروۆانىڭ ءىسىن جەكە باقىلاۋعا الۋدى سۇراپ، اشىق ۇندەۋ جاسادى. سونىمەن قاتار، ولار «جالعان اقپارات تاراتۋ» تۋرالى قىلمىستىق كودەكستىڭ 274-بابىن دەكريميناليزاسيالاۋ ماسەلەسىن كوتەردى.
«ءبىز، قازاقستان جۋرناليستەرى، سىزگە – كونستيتۋسيا كەپىلى ءارى “زاڭ جانە ءتارتىپ” تۇجىرىمداماسىنىڭ اۆتورى رەتىندە جۇگىنەمىز. 2026 جىلعى 20 ناۋرىز كۇنى 20 جىلدان استام تاجىريبەسى بار، ءمىنسىز بەدەلگە يە ارىپتەسىمىز بوتاگوز وماروۆانى استانا قالالىق پوليسيا دەپارتامەنتىنە “اڭگىمەلەسۋگە” شاقىردى. ول ءوز ەركىمەن باردى. الايدا بىرنەشە ساعات ىشىندە ونىڭ مارتەبەسى وزگەرىپ، الدىمەن قورعاۋ قۇقىعى بار كۋاگەردەن، كەيىن قىلمىستىق كودەكستىڭ 274-بابى (“كورىنەۋ جالعان اقپارات تاراتۋ”) بويىنشا كۇدىكتىگە اينالدى»، – دەلىنگەن ۇندەۋدە.
جۋرناليستەردىڭ ايتۋىنشا، بوتاگوز وماروۆا پوليسيا بولىمىندە سەگىز ساعاتتان استام ۋاقىت بولعان.
«21 ناۋرىزعا قاراعان ءتۇنى تەرگەۋ سوتىنىڭ وتىرىسى ءوتىپ، ونىڭ ناتيجەسىندە ەكى اي مەرزىمگە ءۇيقاماق تۇرىندەگى بۇلتارتپاۋ شاراسى تاعايىندالدى. تۇنگى ساعات 3 پەن 5 ارالىعىندا ونىڭ پاتەرىندە ءتىنتۋ جۇرگىزىلدى. قازىرگى ۋاقىتتا وعان ناقتى قاي جۋرناليستىك ماتەريالى ءۇشىن 274-باپ بويىنشا ايىپ تاعىلعانى تۋرالى رەسمي اقپارات جوق. “ماسس-مەديا تۋرالى” زاڭنىڭ 68-بابىنا سايكەس، جۋرناليست، رەداكسيا نەمەسە ب ا ق بەلگىلى ءبىر جاعدايلاردا شىندىققا سايكەس كەلمەيتىن اقپارات تاراتقانى ءۇشىن جاۋاپكەرشىلىكتەن بوساتىلادى. اتاپ ايتقاندا، ەگەر اقپارات رەسمي دەرەككوزدەردەن الىنعان نەمەسە جەكە جانە زاڭدى تۇلعالاردىڭ سوزدەرىن سوزبە-سوز كەلتىرگەن جاعدايدا»، – دەپ ەسكە سالدى ۇندەۋ اۆتورلارى.
ولار بوتاگوز وماروۆانىڭ ءاردايىم كاسىبي مىندەتىن ادال اتقاراتىنىن، اقپاراتتى مۇقيات تەكسەرىپ، زاڭ اياسىندا جۇمىس ىستەيتىنىن اتاپ ءوتتى.
«ءبىز ونىڭ زاڭ بۇزباعانىنا سەنىمدىمىز. سىزدەن بوتاگوز وماروۆانىڭ ءىسىن جەكە باقىلاۋعا الۋدى جانە جۋرناليستەردى مۇنداي قىسىم جاعدايلارىنان قورعاۋدى سۇرايمىز. سەبەبى 274-باپ ءجيى جۋرناليستەرگە قىسىم كورسەتۋ قۇرالى رەتىندە قولدانىلىپ كەلەدى. كونستيتۋسيا كەپىلى رەتىندە وسى باپتى دەكريميناليزاسيالاۋ جونىندە پرەزيدەنتتىك باستاما كوتەرۋىڭىزدى وتىنەمىز. سونىمەن قاتار، ءىستىڭ بارلىق ءمان-جايىن جان-جاقتى، ءادىل جانە اشىق تەرگەپ، پروسەسسۋالدىق نورمالاردىڭ ساقتالۋىن قامتاماسىز ەتىپ، بوتاگوز وماروۆاعا قاتىستى قىلمىستىق قۋدالاۋدى توقتاتۋعا ىقپال ەتۋىڭىزدى سۇرايمىز»، – دەلىنگەن ۇندەۋدە.
ۇندەۋ سوڭىندا: «قۇرمەتپەن، قازاقستان جۋرناليستەرى جانە ءسوز ەركىندىگى ماڭىزدى دەپ سانايتىن ازاماتتار» دەپ كورسەتىلگەن.
