الماتى وبلىسىندا تۋريزم الەۋەتى قارقىندى دامىپ كەلەدى. بۇعان وبلىستىق تۋريزم باسقارماسىنىڭ ۇيىمداستىرۋىمەن وتكەن اقپاراتتىق تۋر بارىسىندا ب ا ق وكىلدەرى كۋا بولدى، دەپ حابارلايدى Dalanews.kz.
ساپار بارىسىندا قاتىسۋشىلار ءوڭىردىڭ نەگىزگى تۋريستىك نىساندارىن ارالاپ، ASP Arena كوپفۋنكسيونالدى كەشەنى، “كوشپەندىلەر قالاشىعى” ەتنومادەني ورتالىعى جانە شونجىداعى دەمالىس ايماقتارىنىڭ ينفراقۇرىلىمىمەن تانىسىپ قايتتى.
ASP Arena كەشەنى
تۋردىڭ العاشقى باعىتى قونايەۆ قالاسىندا ورنالاسقان، حالىقارالىق دەڭگەيدەگى سپورتتىق جارىستار مەن بۇقارالىق ءىس-شارالارعا ارنالعان ASP Arena كەشەنىنەن باستالدى.
ASP Club ارت-ديرەكتورىنىڭ ايتۋىنشا، كەشەن اۋماعىندا ءقوناقۇي، مەيرامحانا، كارتينگ، تاكسي قىزمەتى، كيبەرزونا جانە دەمالىس الاڭدارى بار. ءقازىر مۇندا ورتا ازياداعى ەڭ ۇلكەن مۇز ايدىنى سالىنىپ جاتىر.
“جوبا زاماناۋي جابدىقتارمەن جابدىقتالعان. ءبىر سەانس كەزىندە شامامەن 40 مىڭعا دەيىن كەلۋشىنى قابىلداي الامىز. كومپانيا ەنشىسىندە ءارتۇرلى ولشەمدەگى 5 مىڭ جۇپ جاڭا كونكي بار”، - دەيدى ناتاليا.
كوشپەندىلەر قالاشىعى
كەلەسى ماڭىزدى باعىتتارىنىڭ ءبىرى 2004 جىلى سالىنعان، تانىمال فيلمدەر تۇسىرىلگەن تاريحي-ەتنومادەني كەشەن “كوشپەندىلەر قالاشىعى” بولدى. مۇندا “مىڭ بالا”، “كوشپەندىلەر”، “توميريس” سياقتى تۋىندىلار تۇسىرىلگەن.
الماتى وبلىسى تۋريزم باسقارماسىنىڭ وكىلى فاريزا سەرىكباي قىزىنىڭ ايتۋىنشا، نىسان بۇگىندە تۋريستىك ورتالىققا اينالىپ كەلەدى.
“وبلىس اكىمدىگىنىڭ قولداۋىمەن جاڭا جول سالىنىپ، جارىقتاندىرۋ جۇيەسى جۇرگىزىلدى. تۋريستەردى كوبىرەك تارتۋ ءۇشىن الداعى ۋاقىتتا كەشەن تولىق جوندەۋدەن وتەدى”، - دەيدى ول.
سوزىنشە، لوكاسيا ەتنوتۋريزم، كينوتۋريزم جانە مادەني تۋريزم باعىتىندا جوعارى الەۋەتكە يە.
“كوشپەندىلەر قالاسى ىلە وزەنىنىڭ بويىندا ورنالاسقان جانە بولاشاقتا تولىققاندى تۋريستىك كەشەنگە اينالادى. نىسان جەكە مەنشىك يەسىنىڭ قاراۋىندا، رەكونسترۋكسيا دا جەكە كاسىپكەردىڭ قاتىسۋىمەن جۇزەگە اسادى. تۇسىرىلىمدەر ارنايى رۇقسات ارقىلى عانا جۇرگىزىلەدى”، — دەپ قوستى ول.
شونجىداعى دەمالىس ايماقتارى
اقپاراتتىق تۋر بارىسىندا قاتىسۋشىلار شونجى وڭىرىندەگى ساۋىقتىرۋ-تۋريزم كلاستەرىمەن دە تانىستى. بۇل باعىت تەرمالدى بۇلاقتارعا نەگىزدەلگەن دەمالىس جانە wellness-تۋريزم نىساندارىمەن ەرەكشەلەنەدى.
ماسەلەن، قاتىسۋشىلار ايالداعان All Seasons دەمالىس كەشەنى جىل سايىن 30-35 مىڭعا دەيىن تۋريست قابىلدايدى. نومىرلەرىنىڭ باعاسى 50 مىڭ تەڭگەدەن باستالادى. مۇندا دەمالىس پەن ساۋىقتىرۋعا ارنالعان ينفراقۇرىلىم جولعا قويىلعان.
سونىمەن قاتار قاتىسۋشىلار ECO Park دەمالىس ايماعىنىڭ جۇمىسىمەن دە تانىستى. كەشەن ءبىر كۇندە 200-گە دەيىن تۋريست قابىلداي الادى. مۇندا دا ءقوناقۇي باعاسى 50 مىڭ تەڭگەدەن باستالادى. سونىمەن قاتار 3 مەيرامحانا، spa ايماقتارى مەن ماسساج قىزمەتى بار.
“بيىل قوناقۇيدە جوندەۋ جۇمىستارى تۇراقتى تۇردە جۇرگىزىلىپ جاتىر. ياعني، سۋمەن جابدىقتاۋ جۇيەسى مەن تەحنيكالىق قۇرالدار جاڭاردى. كەيبىر بولمەلەر جوندەۋدە بولعانىمەن، قىزمەت كورسەتۋ جالعاسىپ جاتىر”، – دەلى ECOpark ورتالىعىنىڭ باسشىلىعى.
ايتۋلارىنشا، اقپان ايىنان باستاپ نىسان مەملەكەت قاراۋىنا بەرىلىپ، حالىقارالىق دەڭگەيدەگى تۋريستىك جوبا رەتىندە قاراستىرىلماق. بۇل مۇمكىندىك قازاقستان رەسپۋبليكاسىنىڭ ءاربىر ازاماتىنا، سونىڭ ىشىندە مۇمكىندىگى شەكتەۋلى جاندارعا، قارتتارعا جانە زەينەتكەرلەرگە ارنالعان. قوناقۇيدە ۇسىنىلاتىن بارلىق ەمدىك جانە دەمالىس قىزمەتتەرى مەملەكەتتىك تاپسىرىس ارقىلى تەگىن ۇسىنىلادى.
“باعىت بويىنشا بەس رەت تاماقتانۋ، مينەرالدى سۋ پايدالانۋ جانە ارنايى ەمدىك باعدارلامالار بار. بولاشاقتا اتقا ءمىنۋ مۇمكىندىگىن دە ۇسىنامىز. ءبىز ECOpark-تى حالىقارالىق دەڭگەيدەگى كۋرورتقا اينالدىرۋدى ماقسات ەتىپ وتىرمىز”، – دەيدى باسشىلىق.
كەلەسى نۇكتە FourSeasons قوناق ءۇيى بولدى. بۇل دەمالىس نىسانى دا قازاقستانداعى تۋريستىك باعىتتى دامىتۋدا ماڭىزدى ءرول اتقارىپ وتىر. ياعني، شەتەلدىك جانە قازاقستاندىق تۋريستەرگە زاماناۋي قىزمەت كورسەتە الادى.
سونداي-اق قاتىسۋشىلاردىڭ Nammu Resort دەمالىس ايماعىنا دا جولدارى ءتۇستى. نىسان باسشىسى تەمىرعالي ەسەننىڭ ايتۋىنشا، ءقوناقۇيدىڭ اشىلعانىنا نەبارى 3 اي بولعان.
“دەمالىس ورنىمىزدى زاماناۋي تەحنولوگيالارمەن، شەتەلدىك ستاندارتتارعا ساي ەتىپ جاسادىق”، – دەيدى ول.
سوزىنشە، قازىرگى تاڭدا Nammu Resort-تا جۇزگە جۋىق قىزمەتكەر جۇمىس ىستەيدى. قوناقۇيدە 12 ءتۇرلى جابىق باسسەين مەن مونشالار بار.
“ءبىر كۇندە 120-عا جۋىق ادامدى قابىلداي الامىز. ءۇش ايدىڭ ىشىندە دەمالىس ايماعى 2 مىڭنان استام قوناقتى قابىلدادى”، — دەيدى ول.
تەمىرعالي ەسەن دەمالىس ورنىنا شەتەلدىك قوناقتار دا بەلسەندى تۇردە ات باسىن بۇرىپ جاتقانىن اتاپ ءوتتى.
“قازىرگى ۋاقىتتا يندونەزيالىق تۋريستەر قوناقۇيدە دەمالىپ جاتىر. سونداي-اق قىرعىزستاندىق جانە رەسەيلىك تۋريستەر دە ءجيى كەلەدى”، — دەدى ول.
لوگيستيكا
ەكسكۋرسيا بارىسىندا قاتىسۋشىلار شونجى اۆتوستانسياسىنىڭ جۇمىسىمەن دە تانىستى. اۆتوۆوكزال باسشىسى ساۋىتجان ەربولدىڭ ايتۋىنشا، نىسانعا 2025 جىلدىڭ ساۋىرىنەن باستاپ دايىندىق جۇمىستارى جۇرگىزىلگەن.
“ينفراقۇرىلىمى تولىق دايىن. جولاۋشىلارعا ارنالعان دەمالۋ، تاماقتانۋ، مەديسينالىق كومەك كورسەتۋ جانە تۋريستىك قىزمەت كورسەتۋ ورىندارى بار. 2026 جىلدان باستاپ نەگىزگى تۋريستىك باعىتتار جۇمىس ىستەيدى. الماتىدان قۇلجاعا، دۋلاتىعا جانە شونجى ارقىلى وتەتىن باعىتتار بويىنشا تۋريستىك تاسىمالداۋ قوسىلعان. قىزمەت ساپاسىن ارتتىرۋ ءۇشىن اۆتوبۋستار مەن جەڭىل كولىكتەردى دايىندادىق”، — دەيدى ول.
سوزىنشە، اۆتوۆوكزال تۋريستەردىڭ شەكارادان ءوتۋىن جىلدامداتۋ ءۇشىن ارنايى باعدارلامالاردى ەنگىزىپ جاتىر. قازىرگى تاڭدا كومپانيادا 20-عا جۋىق قىزمەتكەر جۇمىس ىستەيدى. اۆتوۆوكزالدىڭ قۇرىلىس جانە تەحنيكا جابدىقتارى جەرگىلىكتى اكىمدىك پەن وبلىستىق سپورت جانە تۋريزم باسقارماسىنىڭ قولداۋىمەن ىسكە اسىرىلعان.
قورىتىندىلاي كەلە، اتالعان اقپاراتتىق تۋر بارىسىندا قاتىسۋشىلار ءوڭىردىڭ تۋريستىك الەۋەتىمەن تانىسىپ قانا قويماي، جاڭا جوبالاردىڭ جولعا قويىلعانىنا كوز جەتكىزدى.
