قازاقستاندا ەلەكتروساموكات يەلەرى تىركەۋ ءنومىرىن الۋعا مىندەتتەلدى. بۇل تالاپ تەك جالعا بەرىلەتىن ەلەكتروساموكاتتارعا قاتىستى، دەپ حابارلايدى Dalanews.kz.

بۇعان دەيىن مەملەكەت باسشىسى ەلەكتروساموكاتتاردى جالعا بەرۋمەن اينالىساتىن زاڭدى تۇلعالار مەن جەكە كاسىپكەرلەرگە ءبىرقاتار مىندەت جۇكتەيتىن زاڭعا قول قويعان بولاتىن. اتالعان قۇجاتقا سايكەس:

• پايدالانۋشىلاردى مىندەتتى تۇردە سايكەستەندىرۋ جانە قولدانىستاعى جۇرگىزۋشى كۋالىگىنىڭ بار-جوعىن تەكسەرۋ؛

• 18 جاسقا تولماعان جانە جۇرگىزۋشى كۋالىگىنەن ايىرىلعان تۇلعالارعا ەلەكتروساموكاتتى جالعا بەرۋگە ءارى باسقارۋعا تىيىم سالۋ؛

• جول قوزعالىسى ايماعىنا بايلانىستى ساموكاتتىڭ ەڭ جوعارى جىلدامدىعىن اۆتوماتتى تۇردە شەكتەۋ؛

• جاياۋ جۇرگىنشىلەر مەن كولىك قوزعالىسىنا كەدەرگى كەلتىرەتىن ورىنداردا ساموكاتتى قالدىرۋدىڭ الدىن الۋ؛

• ءاربىر ەلەكتروساموكاتقا بىرەگەي تىركەۋ ءنومىرىن بەرۋ جانە ولاردىڭ ورنالاسقان جەرى تۋرالى دەرەكتەردى ءتيىستى مەملەكەتتىك ورگاندارعا جولداۋ تالاپتارى ەنگىزىلدى.

ەلەكتروساموكاتتىڭ جول قوزعالىسىنا قاتىسۋىنا ساقتاندىرۋ ءپوليسى مەن تىركەۋ ءنومىرى بولعان جاعدايدا عانا رۇقسات ەتىلەدى.