الماتىدا جۇرەك ترانسپلانتاسياسىنان وتكەن پاسيەنت اۋرۋحانادان شىعارىلدى. بۇل – قالادا العاش رەت جاسالعان جۇرەك اۋىستىرۋ وتاسى، دەپ حابارلايدى Dalanews.kz.

قالالىق قوعامدىق دەنساۋلىق ساقتاۋ باسقارماسىنىڭ مالىمەتىنشە، قاراشا ايىندا قالالىق كارديولوگيالىق ورتالىق بازاسىندا 34 جاستاعى ەر ادامعا جۇرەك ترانسپلانتاسياسى جاسالعان. ءقازىر ونىڭ جاعدايى تۇراقتى.

ناۋقاس تەرمينالدىق سوزىلمالى جۇرەك جەتكىلىكسىزدىگى دياگنوزىمەن جۇرەك اۋىستىرۋعا ارنالعان رەسپۋبليكالىق كۇتۋ پاراعىندا تۇرعان. دونور 50 جاستاعى ايەل بولعان. ول اۋىر ارتەريالىق گيپەرتەنزيادان زارداپ شەگىپ، ينسۋلت العان. ايەلالماتىنىڭ ورتالىق قالالىق كلينيكالىق اۋرۋحاناسىنا شۇعىل جەتكىزىلگەنىمەن، دارىگەرلەر ءولىمىن تىركەپ، قايتىس بولعاننان كەيىن دونور بولۋعا مۇمكىندىك بارىن راستاعان. مارقۇمنىڭ تۋىستارى كەلىسىم بەرگەن سوڭ، دونورلىق پروسەسس ۇيىمداستىرىلعان.

جۇرەك ترانسپلانتاسياسى بەس ساعاتتان استام ۋاقىتقا سوزىلىپ، ءساتتى اياقتالعان.

پاسيەنت ءوزىنىڭ اۋىر جاعدايىنا ەنەرگەتيكالىق سۋسىنداردى شامادان تىس تۇتىنۋ سەبەپ بولعانىن ايتتى.

"ادامدارعا ەنەرگەتيك ىشپەڭىزدەر دەپ ۇندەۋ جاساعىم كەلەدى. مەندە ءبارى ءدال وسى سۋسىنداردان باستالدى. الدىمەن كۇنىنە ءبىر بوتەلكە ەدى، كەيىن 8–10 ەنەرگەتيككە دەيىن جەتتى. بۇعان ءمان بەرمەدىم، اقىرى اۋىر دياگنوزعا تاپ بولدىم. بۇگىن مەنى امان الىپ قالعان – دارىگەرلەر. ەندى دەنساۋلىققا ۇقىپتى قاراۋدىڭ قانشالىقتى ماڭىزدى ەكەنىن ءتۇسىندىم"، – دەدى ول.

اۋرۋحانادان شىققان سوڭ پاسيەنت تىركەلگەن ەمحاناسىندا باقىلاۋدا بولادى.