ءماجىلىس دەپۋتاتى ايدوس سارىم ۋكرايناداعى «قارا تىزىمگە» ەنگىزىلۋىنە قاتىستى رەداكسيا ءتىلشىسىنىڭ سۇراعىنا جاۋاپ بەردى، دەپ حابارلايدى Dalanews.kz.
ايدوس سارىمنىڭ ايتۋىنشا، شەتەلدەگى قانداي دا ءبىر تىزىمدەر ونىڭ قىزمەتىنە نەمەسە ۇستانىمىنا اسەر ەتپەيدى، ءارى ول بۇل ماسەلەنى جەكە ءوزى ءۇشىن ماڭىزدى دەپ سانامايدى.
«ەڭ باستىسى – قازاقستاننىڭ قارا تىزىمىندە بولماسام بولدى. ماعان رەسەي مەن ۋكراينا حالقى كەرەك ەمەس، ولاردىڭ بىر-بىرىمەن سوعىسقانى دا قىزىق ەمەس. مەنى تەك قازاقستاننىڭ جاعدايى، ءبىزدىڭ ەلدىڭ قاۋىپسىزدىگى مەن بولاشاعى عانا الاڭداتادى»، – دەدى دەپۋتات.
سارىم بۇل ماسەلەگە بايلانىستى سىرتقى ىستەر مينيسترلىگىنە جۇگىنبەگەنىن دە ايتتى. ونىڭ سوزىنشە، ۋكراينادا سوعىس جاعدايىندا جۇمىس ىستەپ جاتقان ديپلوماتتاردى قوسىمشا ماسەلەمەن الاڭداتۋدىڭ قاجەتى جوق.
«ديپلوماتتارعا جۇك ارتۋدىڭ كەرەگى نە؟ ولار ءقازىر كييەۆتە اۋىر جاعدايدا وتىر، ءوز پروبلەمالارى جەتكىلىكتى»، – دەدى ول.
دەپۋتات الەۋمەتتىك جەلىلەر مەن مەديادا بۇل تاقىرىپتىڭ كەڭىنەن تالقىلانۋىنا دا تۇسىنبەيتىنىن جەتكىزدى. ونىڭ پىكىرىنشە، اڭگىمە قانداي دا ءبىر مەملەكەتتىك شەشىم تۋرالى ەمەس، جەكەلەگەن سايتتىڭ باستاماسى جونىندە عانا بولىپ وتىر.
ايتا كەتەيىك، بۇعان دەيىن Dala News رەداكسياسى ايدوس سارىمنىڭ ەسىمى ۋكرايناداعى «ميروتۆورەس» سايتىنىڭ بازاسىندا پايدا بولعانى جونىندە جازعان بولاتىن. اتالعان سايتتا دەپۋتاتقا قاتىستى «گۋمانيتارلىق اگرەسسياعا قاتىسى بار»، «رەسەيلىك نارراتيۆتەردى تاراتتى» دەگەن سيپاتتاعى ايىپتاۋلار كەلتىرىلگەن.
الايدا ايدوس سارىم بۇل تۇجىرىمدارعا جەكە-جەكە توقتالۋدان باس تارتىپ، وزىنە تاعىلعان ايىپتاردى پراكتيكالىق ءمانى جوق باعالار دەپ ەسەپتەيتىنىن ايتتى. ونىڭ سوزىنشە، قازاقستان ىشىندەگى ماسەلەلەر مەن ەل مۇددەسى – كەز كەلگەن سىرتقى باعالاۋدان الدەقايدا ماڭىزدى.
