قازاقستاندا 2040 جىلعا دەيىن ورتاازيالىق تاسباقانى (Testudo horsfieldii) اۋلاۋعا جانە ونىڭ بارلىق ءونىمىن ساتۋعا نەمەسە پايدالانۋعا تىيىم سالىندى، دەپ حابارلايدى Dalanews.kz.
ەكولوگيا مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتىنىڭ مالىمەتىنشە، شەشىم عىلىمي دەرەكتەر مەن پوپۋلياسيانى مونيتورينگتەۋ ناتيجەلەرىنە نەگىزدەلگەن. اتالعان ءتۇر وسال جانۋار رەتىندە تانىلىپ، حالىقارالىق تابيعاتتى قورعاۋ وداعىنىڭ (IUCN) قىزىل تىزىمىنە جانە CITES كونۆەنسياسىنىڭ II قوسىمشاسىنا ەنگىزىلگەن. بۇل تاسباقاعا قاتىستى قورعاۋ شارالارىن كۇشەيتۋدى تالاپ ەتەدى.
ۆەدومستۆو وكىلدەرىنىڭ ايتۋىنشا، اتالعان شارا تابيعي پوپۋلياسياعا تۇسەتىن جۇكتەمەنى ازايتىپ، بيوالۋانتۇرلىلىكتى ساقتاۋعا مۇمكىندىك بەرەدى. تاسباقانى زاڭسىز اۋلاۋ نەمەسە اينالىمعا ەنگىزۋ ءۇشىن قىلمىستىق جاۋاپكەرشىلىك قاراستىرىلعان. ياعني، 3000 اەك-كە دەيىن ايىپپۇل، قوعامدىق جۇمىستار نەمەسە ءۇش جىلعا دەيىن باس بوستاندىعىنان ايىرۋ، سونداي-اق مۇلىك تاركىلەنۋى مۇمكىن.
