قازاقستاندا سالىق ەسەبىن ۋاقتىلى تاپسىرماعانى ءۇشىن ايىپپۇل سالۋ تاجىريبەسىنەن باس تارتۋ جوسپارلانىپ وتىر. بۇل تۋرالى سالىقتىق اكىمشىلەندىرۋدى جەڭىلدەتۋ جونىندەگى الداعى شارالار جايىندا ايتا وتىرىپ، قارجى ءمينيسترى ءمادي تاكييەۆ مالىمدەدى، دەپ حابارلايدى Dalanews.kz.

ۇكىمەت وتىرىسى بارىسىندا مينيستر سالىق دەكلاراسياسى بەلگىلەنگەن مەرزىمدە تاپسىرىلماعان جاعدايدا، ول نولدىك كورسەتكىشتەرمەن تاپسىرىلدى دەپ ەسەپتەلەتىنىن اتاپ ءوتتى. سونىمەن قاتار سالىق تولەۋشىنىڭ قوسىمشا ەسەپتىلىك تاپسىرىپ، دەرەكتەردى دۇرىس ناقتىلاۋ قۇقىعى ساقتالادى.

«فورمالار ازايادى، سالىق ەسەپتىلىگى دە قىسقارادى. ءبىز سالىق ەسەپتىلىگىن جۇيەلى تۇردە وڭتايلاندىرىپ كەلەمىز. سالىق ەسەپتىلىگى نىساندارىنىڭ سانى جىل سايىن ازايىپ جاتىر. مىسالى، 2009 جىلدان بەرى 70-تەن 28-گە دەيىن قىسقاردى، ياعني 60 پايىزعا ازايدى. (…) ەگەر دەكلاراسيا تاپسىرىلماسا، ول نولدىك كورسەتكىشتەرمەن تاپسىرىلدى دەپ ەسەپتەلەدى، بۇل رەتتە قوسىمشا ەسەپتىلىك تاپسىرىپ، دەرەكتەردى ناقتىلاۋ قۇقىعى ساقتالادى»، - دەدى ءمادي تاكييەۆ.

قوسىمشا جاڭاشىلدىقتار 2026 جىلدىڭ 1 قاڭتارىنان باستاپ كۇشىنە ەنەدى. مىندەتتەمەلەرىنىڭ سوماسى 1 ملن تەڭگەدەن اسپايتىن سالىق تولەۋشىلەر ءۇشىن مۇلىك، كولىك جانە جەر سالىقتارى بويىنشا اعىمداعى تولەمدەردىڭ توقسان سايىنعى ەسەپتەۋلەرى الىنىپ تاستالادى.

ونىڭ ورنىنا كاسىپكەرلەر:

– جىل قورىتىندىسى بويىنشا ءبىر عانا دەكلاراسيا تاپسىرادى؛
– سالىقتاردى جىل سوڭىندا تولەيدى، توقسان سايىنعى ەسەپتىلىك بولمايدى.

سالىق قارىزىن ءوندىرۋدىڭ جاڭا ءتارتىبى

مينيستر سونداي-اق سالىق بەرەشەگىن ماجبۇرلەپ ءوندىرۋ تاسىلدەرى قايتا قارالاتىنىن ايتتى. ماقسات – شارالاردىڭ شامادان تىس بولماۋىن قامتاماسىز ەتۋ جانە از سومالار ءۇشىن ميكرو جانە شاعىن بيزنەسكە قىسىم كورسەتپەۋ.

نەگىزگى وزگەرىس – ارەكەت ەتۋ باستالاتىن شەكتەردىڭ ۇلعايۋى. ەندى بەرەشەك بولعان جاعدايدا:

– 87 مىڭ تەڭگەگە دەيىن (20 اەك) – تەك حابارلاما جىبەرىلەدى، ءوسىمپۇل ەسەپتەلەدى، وزگە شارالار قولدانىلمايدى؛
– 87 مىڭنان 195 مىڭ تەڭگەگە دەيىن (20–45 اەك) – ەسكەرتۋ جولدانادى؛ قارىز وتەلمەگەن جاعدايدا شىعىس وپەراسيالارى بەرەشەك سوماسى شەگىندە توقتاتىلادى، كەيىن ينكاسسالىق وكىمدەر قويىلۋى مۇمكىن؛
– 195 مىڭ تەڭگەدەن جوعارى (45 اەك) – قاتاڭ شارالار قولدانىلادى، ونىڭ ىشىندە مۇلىكتى تۇگەندەۋ جانە ساتۋ، سونداي-اق دەبيتورلار ەسەبىنەن ءوندىرىپ الۋ كوزدەلگەن.