استانادا كونستيتۋسيالىق رەفورما جونىندەگى كوميسسيانىڭ العاشقى وتىرىسى ءوتىپ جاتىر، دەپ حابارلايدى Dalanews.kz.
ەرجان جيەنبايەۆ ۆيسە-پرەزيدەنتتىڭ وكىلەتتىگىنە قاتىستى كونستيتۋسيالىق وزگەرىستەرگە توقتالدى. ۆيسە-پرەزيدەنتتى جالپى دەپۋتاتتاردىڭ كوپشىلىك داۋىسىمەن پرەزيدەنت تاعايىندايدى.
ۆيسە-پرەزيدەنتتى قىزمەتىنەن پرەزيدەنت بوساتادى. ۆيسە-پرەزيدەنت:
- پرەزيدەنتتىڭ تاپسىرماسى بويىنشا قازاقستان رەسپۋبليكاسىنىڭ حالىقارالىق قاتىناستارداعى مۇددەلەرىن بىلدىرەدى؛
- قۇرىلتايمەن، ۇكىمەتپەن جانە وزگە دە مەملەكەتتىك ورگاندارمەن ءوزارا ءىس-قيمىل بارىسىندا پرەزيدەنتتىڭ اتىنان وكىلدىك ەتەدى.
- سونىمەن قاتار، ۆيسە-پرەزيدەنت قازاقستان رەسپۋبليكاسى پرەزيدەنتى اتىنان قازاقستان رەسپۋبليكاسىنىڭ جانە شەتەلدەردىڭ قوعامدىق-ساياسي، عىلىمي جانە مادەني-اعارتۋشىلىق ۇيىمدارىمەن قارىم-قاتىناس ورناتادى.
- ۆيسە-پرەزيدەنتتىڭ وزگە دە وكىلەتتەرىن پرەزيدەنت ايقىندايدى.
"ۆيسە-پرەزيدەنت ينستيتۋتىنىڭ ەنگىزىلۋىنە بايلانىستى كونستيتۋسيادان مەملەكەتتىك كەڭەسشى تۋرالى نورمالار الىپ تاستالادى. كونستيتۋسيا دەڭگەيىندە ۆيسە-پرەزيدەنتكە قويىلاتىن تالاپتاردى كوزدەۋ قاجەت. ۆيسە-پرەزيدەنت وكىلدى ورگاننىڭ دەپۋتاتى بولماۋعا، وزگە دە اقىلى لاۋازىمداردى اتقارماۋعا جانە كاسىپكەرلىك قىزمەتتى جۇزەگە اسىرماۋعا ءتيىس. ءوز وكىلەتتىكتەرىن جۇزەگە اسىرۋ كەزەڭىندە ۆيسە-پرەزيدەنت ساياسي پارتيانىڭ مۇشەسى بولماۋعا ءتيىس. مۇنداي ءتارتىپ ساياسي باسەكەلەستىكتى ارتتىرۋعا جانە بارلىق پارتيانىڭ دامۋى ءۇشىن تەڭ جاعدايدى قامتاماسىز ەتۋگە باعىتتالعان ۇستانىمعا سايكەس كەلەدى"، - دەدى ول.
