قازاقستاندا ۆيسە-پرەزيدەنت لاۋازىمى پايدا بولادى. بۇل تۋرالى ۇلتتىق قۇرىلتاي وتىرىسىندا ءسوز سويلەگەن پرەزيدەنت قاسىم-جومارت توقايەۆ مالىمدەدى، دەپ حابارلايدى Dalanews.kz.
"قازاقستان رەسپۋبليكاسىنىڭ ۆيسە-پرەزيدەنتى ينستيتۋتىن قۇرۋ جانە ونى كونستيتۋسيادا ءتيىستى تۇردە بەكىتۋ تۋرالى اڭگىمە بولىپ وتىر. ۆيسە-پرەزيدەنتتى پارلامەنتتىڭ كەلىسىمىمەن قاراپايىم كوپشىلىك داۋىسپەن پرەزيدەنت تاعايىندايدى. ونىڭ وكىلەتتىگىن مەملەكەت باسشىسىنىڭ ءوزى ايقىندايدى"، - دەدى پرەزيدەنت.
ۆيسە-پرەزيدەنت پرەزيدەنتتىڭ تاپسىرماسى بويىنشا:
- حالىقارالىق فورۋمداردا جانە شەت مەملەكەتتەردىڭ دەلەگاسيالارىمەن كەلىسسوزدەردە قازاقستان رەسپۋبليكاسىنىڭ مۇددەسىن تانىتادى؛
- پارلامەنتتە پرەزيدەنتتىڭ مۇددەسىن تانىتادى؛
- وتاندىق جانە شەتەلدىك قوعامدىق-ساياسي، عىلىمي جانە مادەني-اعارتۋ ۇيىمدارىمەن ءوزارا ءىس-قيمىل جاسايدى؛
- پرەزيدەنتتىڭ وزگە دە تاپسىرمالارىن ورىندايدى.
