قازاقستاندا مەملەكەتتىك قىزمەتتەگى ەڭ جاس جانە ەڭ ەگدە شەنەۋنىكتەردىڭ رەيتينگى جاسالدى، دەپ حابارلايدى Dalanews.kz Dailybiz.kz-كە سىلتەمە جاساپ.
اشىق دەرەكتەرگە سۇيەنگەن تىزىمدە ۆيسە-مينيسترلەر، اكىمدەر، اگەنتتىك ءتوراعالارى مەن ورتالىق مەملەكەتتىك ورگاندار باسشىلارى قامتىلعان.
ەڭ جاس شەنەۋنىكتەر
ەڭ جاس شەنەۋنىكتەر رەيتينگىندە كوش باستاعان – 32 جاستاعى اسىلبەك احمەتجانوۆ. ول – وقۋ-اعارتۋ ۆيسە-مينيسترى. مەملەكەتتىك قىزمەتتەگى ەڭبەك ءوتىلى 9 جىل، ايلىعى – 1،52 ملن تەڭگە.
ەكىنشى ورىندا 33 جاستاعى ازىمبەك پازىلبەك ۇلى. ول تۇركىستان قالاسىنىڭ اكىمى، ەڭبەك ءوتىلى 12 جىل، جالاقىسى – 836،9 مىڭ تەڭگە.
ءۇشىنشى جانە ءتورتىنشى ورىنداردى 34 جاستاعى شەنەۋنىكتەر يەلەنگەن. اتاپ ايتقاندا، ەنەرگەتيكا ۆيسە-مينيسترى قايىرجان تۇتقىشبايەۆ (ءوتىلى 14 جىل) جانە جاساندى ينتەللەكت پەن سيفرلىق دامۋ ۆيسە-مينيسترى دميتريي مۋن (ءوتىلى 11 جىل). ەكەۋىنىڭ دە ايلىعى – 1،52 ملن تەڭگە.
بەسىنشى ورىندا – ادىلەت ۆيسە-مينيسترى بەكبولات مولدابەكوۆ (34 جاس، ءوتىلى 10 جىل).
التىنشى ورىن – وسكەمەن قالاسىنىڭ اكىمى المات اقىشوۆ (35 جاس، جالاقىسى 836،9 مىڭ تەڭگە).
رەيتينگتىڭ قالعان بولىگىندە دە نەگىزىنەن ۆيسە-مينيسترلەر بار. ولاردىڭ قاتارىندا جاساندى ينتەللەكت جانە سيفرلىق دامۋ ۆيسە-مينيسترى روستيسلاۆ كونياشكين، مادەنيەت جانە اقپارات ۆيسە-مينيسترى ەۆگەنيي كوچەتوۆ، باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى مارات وماروۆ، اۋىل شارۋاشىلىعى ۆيسە-مينيسترى ەرمەك كەنجەحان ۇلى، ەكولوگيا جانە تابيعي رەسۋرستار ۆيسە-مينيسترلەرى نۇرلان قۇرمالايەۆ پەن مانسۇر وشۋربايەۆ بار. بۇل شەنەۋنىكتەردىڭ جاسى 36–37 ارالىعىندا.
ەڭ كارى شەنەۋنىكتەر
ەڭ ەگدە شەنەۋنىكتەر رەيتينگىندە 64 جاستاعى نۇرلان ءابدىروۆ ءبىرىنشى ورىنعا شىقتى. ول – ورتالىق سايلاۋ كوميسسياسىنىڭ ءتوراعاسى، مەملەكەتتىك قىزمەتتەگى ءوتىلى 43 جىل.
ەكىنشى ورىندا – ەكولوگيا جانە تابيعي رەسۋرستار ءمينيسترى ەرلان نىسانبايەۆ (64 جاس، ءوتىلى 41 جىل).
ءۇشىنشى جانە ءتورتىنشى ورىنداردى 62 جاستاعى شەنەۋنىكتەر يەلەنگەن: ىشكى ىستەر ءمينيسترىنىڭ ورىنباسارى يگور لەپەحا جانە جەتىسۋ وبلىسىنىڭ اكىمى بەيبىت يسابايەۆ.
بەسىنشى ورىندا – باس پروكۋرور بەرىك اسىلوۆ (61 جاس).
التىنشى ورىندا – باتىس قازاقستان وبلىسىنىڭ اكىمى ناريمان تورەعالييەۆ.
رەيتينگتىڭ سوڭعى بولىگىندە اقمولا وبلىسىنىڭ اكىمى مارات احمەتجانوۆ، قوستاناي وبلىسىنىڭ اكىمى قۇمار اقساقالوۆ، قورعانىس ءمينيسترىنىڭ ءبىرىنشى ورىنباسارى سۇلتان كامالەتدينوۆ جانە پەتروپاۆل قالاسىنىڭ اكىمى سەرىك مۇحامەدييەۆ بار. ولاردىڭ جاسى – 60–61 ارالىعى.
رەيتينگ دەرەكتەرى قازاقستاندا باسقارۋ جۇيەسىندە ءبىر مەزەتتە ءارى جاس كادرلار، ءارى ونداعان جىلدىق تاجىريبەسى بار شەنەۋنىكتەر قاتار قىزمەت اتقارىپ وتىرعانىن كورسەتەدى.
