قازاقستاندىق ماماندار اتوم ەنەرگەتيكاسى جانە جاساندى ينتەللەكت سالاسىندا “بولاشاق” باعدارلاماسى اياسىندا شەتەلدە ءبىلىم الۋ مۇمكىندىگىنە يە بولادى. بۇل تۋرالى مەملەكەتتىك كەڭەسشى ەرلان قارين مالىمدەدى، دەپ حابارلايدى Dalanews.kz.
بيىل "بولاشاق" ستيپەندياسىنا كونكۋرس ەرەجەلەرى جاڭارتىلدى. ۇمىتكەرلەر ءۇش كەزەڭنەن تۇراتىن ىرىكتەۋدەن وتەدى: كەشەندى تەستىلەۋ، سۇحبات جانە رەسپۋبليكالىق كوميسسيانىڭ ەڭ جوعارى ۇپاي جيناعان قاتىسۋشىلاردى ىرىكتەۋى. سونىمەن قاتار ءبىر كۇنتىزبەلىك جىل ىشىندە كونكۋرسقا قايتا قاتىسۋ مۇمكىندىگى قاراستىرىلعان، بۇل الەۋەتتى ۇمىتكەرلەرگە باعدارلامادا ءوز مۇمكىندىگىن سىناۋعا قوسىمشا مۇمكىندىك بەرەدى.
كونكۋرس قورىتىندىسى بويىنشا 225 قازاقستاندىق ازامات حالىقارالىق «بولاشاق» ستيپەندياسىن يەلەندى. ورتا ەسەپپەن ءبىر ورىنعا ءتورت ۇمىتكەردەن كەلدى. سونداي-اق، بيىل شەتەلدىك جوعارى وقۋ ورىندارى مەن عىلىمي ورتالىقتارعا قويىلاتىن تالاپتار وزگەردى: ولار حالىقارالىق بەدەلدى رەيتينگتەردە ۇزدىك 100 ورىنعا ەنۋى كەرەك. بۇل "بولاشاق" ستيپەندياسى اياسىنداعى اكادەميالىق ءبىلىم ساپاسىن ارتتىرۋعا جول اشادى.
جاڭا ستيپەنديانتتاردىڭ 152ء-سى ماگيستراتۋرادا، 16-سى دوكتورانتۋرادا وقيدى، ال 57 وتانداسىمىز شەتەلدىك ۋنيۆەرسيتەتتەر مەن ورتالىقتاردا كاسىبي تاعىلىمدامادان وتەدى. سونىمەن قاتار 182 قازاقستاندىق الەمنىڭ جەتەكشى عىلىمي جانە زەرتتەۋ ورتالىقتارىندا تاعىلىمدامادان وتۋگە گرانت الدى. ىرىكتەۋ ساپاسىن ارتتىرۋ ماقساتىندا ۇمىتكەرلەرگە قويىلاتىن تالاپتار كۇشەيتىلدى: بەدەلدى باسىلىمداردا عىلىمي ماقالالاردىڭ نەمەسە حالىقارالىق پاتەنتتەردىڭ بولۋى مىندەتتى بولىپ سانالادى. عىلىمي تاعىلىمداما باعىتتارى ۇكىمەت جانىنداعى جوعارى عىلىمي-تەحنيكالىق كوميسسيانىڭ باسىمدىقتارىنا سايكەس ۇيلەستىرىلدى.
وتىرىستا 2026 جىلى كاسىبي تاعىلىمدامادان وتۋشىلەر ءۇشىن جاڭا سانات – "جاساندى ينتەللەكت جۇيەسىن پايدالانۋشىلار" بەكىتىلدى. ەكونوميكانىڭ ءتۇرلى سالاسىن سيفرلاندىرۋ باعدارلاماسى جاساندى ينتەللەكت قۇزىرەتتەرىن دامىتۋ قاجەتتىلىگىن تۋىنداتادى، بۇل ۇلتتىق ەكونوميكانىڭ باسەكەگە قابىلەتتىلىگىن ارتتىرۋ جانە نەگىزگى سالالاردى دامىتۋ ءۇشىن ماڭىزدى دەپ سانالادى.
سونىمەن قاتار 2026 جىلدان باستاپ ماگيستراتۋرا، دوكتورانتۋرا جانە تاعىلىمداما بويىنشا اتوم ەنەرگەتيكاسى سالاسىنداعى مامانداردى دايارلاۋعا ارنايى سانات ەنگىزىلەدى. جىل سايىن بۇل باعىتقا 20 كۆوتا بولىنەدى، بۇل وتاندىق اتوم ونەركاسىبىنە قاجەتتى بىلىكتى كادرلاردى ۋاقتىلى دايارلاۋعا مۇمكىندىك بەرەدى.
جالپى، جاراتىلىستانۋ-تەحنيكالىق باعىتتاعى "بولاشاق" ستيپەنديالارىنىڭ ۇلەسى 2022 جىلعى 59،2%-دان 2025 جىلى 70%-عا دەيىن ءوستى. ينجەنەرلىك-تەحنيكالىق ماماندىقتار بويىنشا عىلىمي تاعىلىمدامالارعا بەرىلگەن ستيپەنديالاردىڭ ۇلەسى 46%-دان 72،4%-عا ارتتى.
وتىرىس قورىتىندىسى بويىنشا ەرلان قارين "بولاشاق" حالىقارالىق ستيپەندياسىن ودان ءارى ىسكە اسىرۋ جانە جەتىلدىرۋ جونىندە ناقتى تاپسىرمالار بەردى.
