2025 جىلدىڭ قورىتىندىسى بويىنشا ۇلتتىق قوردىڭ اكتيۆتەرى 77،7 ميلليارد دوللاردان اسۋى ءتيىس. بۇل تۋرالى بەلگىلى ساراپشى ايبار ولجايەۆ ايتتى، دەپ حابارلايدى Dalanews.kz.

ونىڭ سوزىنشە، قازاقستان تاريحىندا ۇلتتىق قورداعى اقشا مۇنداي مەجەگە ءبىرىنشى رەت جەتىپ وتىر. ءبىز ءۇشىن بۇعان دەيىن قوردىڭ ەڭ بيىك نۇكتەگە كوتەرىلگەنى 2014 جىل بولاتىن. سول ۋاقىتتا، 11 جىل بۇرىن ۇلتتىق قور 75،2 ميلليارد دوللارعا دەيىن ءوستى.

"ءبىراق 2014 جىلعى كريزيستە نازاربايەۆ ۇكىمەتكە ۇلتتىق قوردىڭ اقشاسىن بارىنشا پايدالانۋعا پارمەن بەردى دە، سول ۋاقىتتان بەرى اتقارۋشى بيلىك ترانسفەرتتەر ارقىلى قوردى جىل سايىن جۇلمالاپ كەلدى. سونىڭ كەسىرىنەن ءتىپتى وسى قور سارقىلادى دەگەن قاۋىپتەر پايدا بولعانى ەستە. سوڭعى 10 جىلدا ۇلتتىق قوردىڭ ايانىشتى ءحالى 2022 جىلى تىركەلگەن ەدى. پاندەميا مەن پوستپاندەميانىڭ بيۋدجەتتىك ترانسفەرتتەرى ءوسىپ، قور اكتيۆتەرى 57،9 ميلليارد دوللارعا دەيىن قۇلدىرادى. ءبىراق ودان كەيىن قور بىرتىندەپ وسە باستادى"، - دەيدى ولجايەۆ. 

ساراپشى 2024-2025 جىلعى ۇلتتىق قوردىڭ جاقسى وسۋىنە مۇنايدىڭ ەشقانداي اسەرى بولماعانىن اتاپ ءوتتى.

"ءتىپتى بۇل كەزەڭدە مۇناي باعاسى باررەلىنە 72 دوللاردان 60 دوللارعا ارزانداپ، مۇنايدان كەلەتىن اقشا ازايىپ كەتكەنىن ايتۋ كەرەك. تابىس پەن جەتىستىكتىڭ بارلىعى ۇلتتىق بانكتىڭ قوردىڭ اقشاسىن دۇرىس ينۆەستيسيالاۋىنان كەلدى. ءبىز ينۆەستيسيالىق ساياساتتى وزگەرتىپ، كىرىسى تىم از دامىعان ەلدەردىڭ ااا كاتەگوريالى وبليگاسيالارىنان كىرىستىلىگى كوبىرەك دامۋشى ەلدەردىڭ سۋۆەرەندى قارىزدارى مەن اكسيالار نارىعىنا ويىسا باستادىق. سونىڭ ارقاسىندا 2025 جىلدىڭ 9 ايىندا 12،6 ميلليارد دوللار ينۆەستيسيالىق تابىس تاپتىق. بۇل مۇناي سەكتورى اكەلگەن اقشادان كەمىندە 40 پايىزعا كوپ"، - دەيدى ساراپشى. 

ايبار ولجايەۆ ۇلتتىق قور 2001 جىلى قۇرىلعانىن، سول جىلى وعان ەڭ العاشقى اقشا – شيەۆرون تولەگەن 600 ميلليون دوللار سالىنعانىن اتاپ ءوتتى.

"10 جىلدان كەيىن، ياعني 2011 جىلى قازاقستان ۇلتتىق قوردىڭ قازىناسىن 46 ميلليارد دوللارعا دەيىن ارتتىردى. ءبىراق تاعى 10 جىلدان كەيىن - 2021 جىلى قور اكتيۆتەرى 59،5 ميلليارد دوللارعا ارەڭ جەتتى. ياعني وسى 10 جىل مەرزىم ىشىندە بار-جوعى 13-14 ميلليارد دوللارعا عانا وسە الدى. سەبەبى، 2014 جىلعى پرەزيدەنت شەشىمى قوردىڭ بولاشاعىن تۇماندى قىلعان ەدى. سول جىلدارى قوردان اعىلعان ترانسفەرتتەر حالىققا قىزمەت ەتپەدى. ولار فيير دەگەن ءتۇرلى وتىرىك جوبالار ارقىلى ەليتانىڭ اقشا جىمقىرۋىنا مۇمكىندىك بەردى"، - دەيدى مامان.

ولجايەۆتىڭ سوزىنشە، ەندى ۇلتتىق قوردى ەشكىم سارقىپ بىتىرە المايدى.

"بيىل ۇلتتىق قوردان الىناتىن ترانسفەرت 2،77 تريلليون تەڭگەمەن شەكتەلدى. مىسالى، بىلتىر 5،25 تريلليون تەڭگە الىنعان ەدى. دەمەك، اكسيالار نارىعىندا تۇراقتىلىق ساقتالسا، بيىل تاعى 13 ميلليارد دوللار قوسا الامىز دا، 2026 جىلدىڭ سوڭىندا ۇلتتىق قوردى 90 ميلليارد دوللارعا دەيىن تولتىرۋعا مىقتى شانس بار. سول كۇنگە جەتەيىك"، - دەيدى ساراپشى.