يران 15 قاڭتار تاڭىنا دەيىن ءوز اۋە كەڭىستىگىن بارلىق ۇشاقتار ءۇشىن جاپتى. تەك الدىن الا رۇقسات العان حالىقارالىق رەيستەرگە عانا ۇشۋعا مۇمكىندىك بەرىلىپ وتىر. بۇعان دەيىن، 14 قاڭتاردا Reuters اگەنتتىگى اقش الداعى تاۋلىكتە يرانعا سوققى جاساۋى مۇمكىن ەكەنىن حابارلاعان بولاتىن، دەپ حابارلايدى Dalanews.kz.
وسىعان بايلانىستى Air Astana ءبىرقاتار تۇراقتى جانە چارتەرلىك رەيستەردىڭ باعىتى وزگەرەتىنىن مالىمدەدى. كومپانيانىڭ حابارلاۋىنشا، بۇعان يران اۋە كەڭىستىگىنىڭ جابىلۋى سەبەپ بولعان.
«شارم-ەل-شەيح، دۋباي، دوحا جانە مەدينا باعىتتارىنداعى رەيستەر يران اۋە كەڭىستىگىن اينالىپ ۇشادى. Air Astana جاعدايدى ءجىتى باقىلاپ وتىر»، – دەپ حابارلادى اۋە تاسىمالداۋشى.
سونىمەن قاتار، كومپانيا جولاۋشىلاردان رەيستەردىڭ مارتەبەسىن الدىن الا تەكسەرىپ وتىرۋدى سۇرايدى، ويتكەنى ۇشۋ جانە قونۋ ۋاقىتتارىندا وزگەرىستەر بولۋى مۇمكىن.
بۇعان دەيىن يران بيلىگى ەل ۇستىندەگى اۋە كەڭىستىگىن جابۋ مەرزىمىن استانا ۋاقىتىمەن تاڭعى 8:30-عا دەيىن ۇزارتقان. بۇل شەشىم يرانعا ۇشاتىن نەمەسە يراننان ۇشاتىن، ارنايى رۇقساتى بار حالىقارالىق رەيستەردەن وزگە بارلىق ۇشۋلارعا قاتىستى. ب ا ق مالىمەتىنشە، مۇنداي شەكتەۋ ەل ىشىندەگى نارازىلىق اكسيالارى اياسىندا ەنگىزىلگەن.
