2026 jylǵa dollar baǵamy 535 teńge tóńireginde bolady degen boljam jarıalanǵan soń, ulttyq valútanyń bolashaǵy taǵy da qyzý talqyǵa tústi. Bul máselege Qazaq Expert Club sarapshysy, qarjyger Venera Janalına pikir bildirdi, dep habarlaıdy Dalanews.kz.
Onyń aıtýynsha, qazirgi jaǵdaıda teńgeniń kúrt qunsyzdanýyna alyp keletin aıqyn ekonomıkalyq alǵysharttar joq. Baǵam belgili bir deńgeıde qubylýy múmkin, táýekelder teńgeniń birshama álsireýin kórsetkenimen, bul naryqqa tán qalypty qozǵalystar sheńberinde ótedi. Iaǵnı valútalyq quldyraý kútilmeıdi.
"Teńgeniń álsireýine áser etýi múmkin negizgi syrtqy faktorlardyń biri – Brent markaly munaı baǵasy. Boljam boıynsha, 2026 jyly munaıdyń ortasha baǵasy barreline shamamen 62–64 dollar bolýy yqtımal. Bul kórsetkish 2025 jylǵy ortasha deńgeıden (68–69 dollar) tómen, sáıkesinshe eksporttyq tabys pen ulttyq valútaǵa qysym túsirýi múmkin", - deıdi ol.
İshki faktorlar qatarynda búdjet saıasaty, ımport kóleminiń artýy jáne ınflásıalyq kútýler atalady. Ulttyq bank pen naryq qatysýshylarynyń baǵalaýynsha, bıyl ınflásıa 9,5–11% aralyǵynda saqtalýy múmkin. Bul halyqtyń satyp alý qabiletine jáne valútalyq kútýlerge áser etpeı qoımaıdy.
"Sonymen birge teńgeni qoldaıtyn mańyzdy tetik – qatań aqsha-kredıt saıasaty. Bazalyq mólsherlemeniń 18% deńgeıinde saqtalýy teńgelik aktıvterdiń tartymdylyǵyn arttyryp, kapıtal aǵynyn kúsheıtedi. Alaıda ınflásıalyq qysym kúsheıip, ishki suranys ósse, bul faktordyń áseri álsireýi múmkin", - deıdi sarapshy.
Sarapshy Qazaqstanda valútalyq turaqtylyqty saqtaıtyn mańyzdy qorlar bar ekenin atap ótti. Eldiń altyn-valúta rezervteri aıtarlyqtaı kólemde, al Ulttyq qor aktıvteri syrtqy kúızelisterge qarsy qosymsha qorǵanys qyzmetin atqarady.
