Almaty oblysynda týrızm áleýeti qarqyndy damyp keledi. Buǵan oblystyq týrızm basqarmasynyń uıymdastyrýymen ótken aqparattyq týr barysynda BAQ ókilderi kýá boldy, dep habarlaıdy Dalanews.kz.
Sapar barysynda qatysýshylar óńirdiń negizgi týrısik nysandaryn aralap, ASP Arena kópfýnksıonaldy kesheni, “Kóshpendiler qalashyǵy” etnomádenı ortalyǵy jáne Shonjydaǵy demalys aımaqtarynyń ınfraqurylymymen tanysyp qaıtty.
ASP Arena kesheni
Týrdyń alǵashqy baǵyty Qonaev qalasynda ornalasqan, halyqaralyq deńgeıdegi sporttyq jarystar men buqaralyq is-sharalarǵa arnalǵan ASP Arena kesheninen bastaldy.
ASP Club art-dırektorynyń aıtýynsha, keshen aýmaǵynda qonaqúı, meıramhana, kartıń, taksı qyzmeti, kıberzona jáne demalys alańdary bar. Qazir munda Orta Azıadaǵy eń úlken muz aıdyny salynyp jatyr.
“Joba zamanaýı jabdyqtarmen jabdyqtalǵan. Bir seans kezinde shamamen 40 myńǵa deıin kelýshini qabyldaı alamyz. Kompanıa enshisinde ártúrli ólshemdegi 5 myń jup jańa kónkı bar”, - deıdi Natalá.
Kóshpendiler qalashyǵy
Kelesi mańyzdy baǵyttarynyń biri 2004 jyly salynǵan, tanymal fılmder túsirilgen tarıhı-etnomádenı keshen “Kóshpendiler qalashyǵy” boldy. Munda “Myń bala”, “Kóshpendiler”, “Tomırıs” sıaqty týyndylar túsirilgen.
Almaty oblysy týrızm basqarmasynyń ókili Farıza Serikbaıqyzynyń aıtýynsha, nysan búginde týrısik ortalyqqa aınalyp keledi.
“Oblys ákimdiginiń qoldaýymen jańa jol salynyp, jaryqtandyrý júıesi júrgizildi. Týrıserdi kóbirek tartý úshin aldaǵy ýaqytta keshen tolyq jóndeýden ótedi”, - deıdi ol.
Sózinshe, lokasıa etnotýrızm, kınotýrızm jáne mádenı týrızm baǵytynda joǵary áleýetke ıe.
“Kóshpendiler qalasy İle ózeniniń boıynda ornalasqan jáne bolashaqta tolyqqandy týrısik keshenge aınalady. Nysan jeke menshik ıesiniń qaraýynda, rekonstrýksıa da jeke kásipkerdiń qatysýymen júzege asady. Túsirilimder arnaıy ruqsat arqyly ǵana júrgiziledi”, — dep qosty ol.
Shonjydaǵy demalys aımaqtary
Aqparattyq týr barysynda qatysýshylar Shonjy óńirindegi saýyqtyrý-týrızm klasterimen de tanysty. Bul baǵyt termaldy bulaqtarǵa negizdelgen demalys jáne wellness-týrızm nysandarymen erekshelenedi.
Máselen, qatysýshylar aıaldaǵan All Seasons demalys kesheni jyl saıyn 30-35 myńǵa deıin týrıs qabyldaıdy. Nómirleriniń baǵasy 50 myń teńgeden bastalady. Munda demalys pen saýyqtyrýǵa arnalǵan ınfraqurylym jolǵa qoıylǵan.
Sonymen qatar qatysýshylar ECO Park demalys aımaǵynyń jumysymen de tanysty. Keshen bir kúnde 200-ge deıin týrıs qabyldaı alady. Munda da qonaqúı baǵasy 50 myń teńgeden bastalady. Sonymen qatar 3 meıramhana, spa aımaqtary men massaj qyzmeti bar.
“Bıyl qonaqúıde jóndeý jumystary turaqty túrde júrgizilip jatyr. Iaǵnı, sýmen jabdyqtaý júıesi men tehnıkalyq quraldar jańardy. Keıbir bólmeler jóndeýde bolǵanymen, qyzmet kórsetý jalǵasyp jatyr”, – deli ECOpark ortalyǵynyń basshylyǵy.
Aıtýlarynsha, aqpan aıynan bastap nysan memleket qaraýyna berilip, halyqaralyq deńgeıdegi týrısik joba retinde qarastyrylmaq. Bul múmkindik Qazaqstan Respýblıkasynyń árbir azamatyna, sonyń ishinde múmkindigi shekteýli jandarǵa, qarttarǵa jáne zeınetkerlerge arnalǵan. Qonaqúıde usynylatyn barlyq emdik jáne demalys qyzmetteri memlekettik tapsyrys arqyly tegin usynylady.
“Baǵyt boıynsha bes ret tamaqtaný, mıneraldy sý paıdalaný jáne arnaıy emdik baǵdarlamalar bar. Bolashaqta atqa miný múmkindigin de usynamyz. Biz ECOpark-ty halyqaralyq deńgeıdegi kýrortqa aınaldyrýdy maqsat etip otyrmyz”, – deıdi basshylyq.
Kelesi núkte FourSeasons qonaq úıi boldy. Bul demalys nysany da Qazaqstandaǵy týrısik baǵytty damytýda mańyzdy ról atqaryp otyr. Iaǵnı, sheteldik jáne qazaqstandyq týrıserge zamanaýı qyzmet kórsete alady.
Sondaı-aq qatysýshylardyń Nammu Resort demalys aımaǵyna da joldary tústi. Nysan basshysy Temirǵalı Esenniń aıtýynsha, qonaqúıdiń ashylǵanyna nebári 3 aı bolǵan.
“Demalys ornymyzdy zamanaýı tehnologıalarmen, sheteldik standarttarǵa saı etip jasadyq”, – deıdi ol.
Sózinshe, qazirgi tańda Nammu Resort-ta júzge jýyq qyzmetker jumys isteıdi. Qonaqúıde 12 túrli jabyq baseın men monshalar bar.
“Bir kúnde 120-ǵa jýyq adamdy qabyldaı alamyz. Úsh aıdyń ishinde demalys aımaǵy 2 myńnan astam qonaqty qabyldady”, — deıdi ol.
Temirǵalı Esen demalys ornyna sheteldik qonaqtar da belsendi túrde at basyn buryp jatqanyn atap ótti.
“Qazirgi ýaqytta ındonezıalyq týrıser qonaqúıde demalyp jatyr. Sondaı-aq qyrǵyzstandyq jáne reseılik týrıser de jıi keledi”, — dedi ol.
Logıstıka
Ekskýrsıa barysynda qatysýshylar Shonjy avtostansıasynyń jumysymen de tanysty. Avtovokzal basshysy Saýytjan Erboldyń aıtýynsha, nysanǵa 2025 jyldyń sáýirinen bastap daıyndyq jumystary júrgizilgen.
“Infraqurylymy tolyq daıyn. Jolaýshylarǵa arnalǵan demalý, tamaqtaný, medısınalyq kómek kórsetý jáne týrısik qyzmet kórsetý oryndary bar. 2026 jyldan bastap negizgi týrısik baǵyttar jumys isteıdi. Almatydan Quljaǵa, Dýlatyǵa jáne Shonjy arqyly ótetin baǵyttar boıynsha týrısik tasymaldaý qosylǵan. Qyzmet sapasyn arttyrý úshin avtobýstar men jeńil kólikterdi daıyndadyq”, — deıdi ol.
Sózinshe, avtovokzal týrıserdiń shekaradan ótýin jyldamdatý úshin arnaıy baǵdarlamalardy engizip jatyr. Qazirgi tańda kompanıada 20-ǵa jýyq qyzmetker jumys isteıdi. Avtovokzaldyń qurylys jáne tehnıka jabdyqtary jergilikti ákimdik pen oblystyq sport jáne týrızm basqarmasynyń qoldaýymen iske asyrylǵan.
Qorytyndylaı kele, atalǵan aqparattyq týr barysynda qatysýshylar óńirdiń týrısik áleýetimen tanysyp qana qoımaı, jańa jobalardyń jolǵa qoıylǵanyna kóz jetkizdi.
