Memleket basshysynyń «Taza Qazaqstan» bastamasy aıasynda Sý resýrstary jáne ırrıgasıa mınıstrligi elimizdiń barlyq óńirinde bulaqtardy tazalaýǵa baǵyttalǵan «Móldir bulaq» ekologıalyq aksıasyn bastady, dep habarlaıdy Dalanews.kz.
Aýa raıyna baılanysty alǵashqy kezeńde aksıa elimizdiń ońtústik óńirlerindegi 28 bulaqta ótkizildi. Atap aıtqanda, Shymkent qalasy, Almaty, Jambyl, Qyzylorda, Túrkistan jáne Jetisý oblystary. Aksıaǵa bir mezgilde shamamen 3,8 myń adam qatysty. Olar bulaqtardyń kózin ashyp, qalpyna keltirdi. Sonymen qatar aınalasyndaǵy aýmaqtar tazartylyp, abattandyryldy, qoqys jınalyp, kóshetter otyrǵyzyldy.
Sý resýrstary jáne ırrıgasıa mınıstri Nurjan Nurjigitov pen Jambyl oblysynyń ákimi Erbol Qarashókeev Jambyl aýdanyndaǵy Jalǵyztal bulaǵyn tazalaý jumystaryna qatysty. Bulaq Aısha bıbi aýylynan 16 shaqyrym jerde ornalasqan.
Sondaı-aq «Móldir bulaq» aksıasy aıasyndaǵy is-sharalar Jambyl oblysynyń Merki, Sarysý, Shý, Talas, Rysqulov, Baızaq jáne Qordaı aýdandaryndaǵy jeti bulaqta ótti. Bulaqtardy tazalaý jumystaryna Sý resýrstary jáne ırrıgasıa mınıstrligi mamandary, «Qazsýshar» RMK oblystyq fılıalynyń, Shý-Talas baseındik ınspeksıasynyń jáne Qazaq sý sharýashylyǵy ǵylymı-zertteý ınstıtýtynyń qyzmetkerleri, sondaı-aq eriktiler men stýdentter qatysty.
Sý resýrstary jáne ırrıgasıa mınıstrliginiń bastamasymen Jambyl oblysynda sý salasyndaǵy alǵashqy eriktiler qozǵalysy – «Bolashaqtyń qaınary» quryldy. Onyń qataryna Taraz qalasyndaǵy Qazaq ulttyq sý sharýashylyǵy jáne ırrıgasıa ýnıversıtetiniń stýdentteri qosyldy. Osyndaı eriktiler toptaryn elimizdiń basqa óńirlerinde de qurý josparlanyp otyr.
«Bolashaqtyń qaınary» qozǵalysy tek ekologıalyq aksıalarǵa qatysýmen shektelmeıdi. Belsendi jastar sý únemdeýdi nasıhattaý jáne qoǵamda ekologıalyq mádenıetti qalyptastyrý baǵytyndaǵy júıeli jumystarǵa atsalysady.
«Búgingi is-sharaǵa eriktiler men stýdentterdiń qatysyp otyrǵany erekshe qýantady. Memleket basshysy eriktiler qozǵalysyna árdaıym erekshe kóńil bólip, olardyń qoǵamdaǵy rólin joǵary baǵalap keledi. Bizdiń mınıstrliktiń bastamasymen elimizde alǵash ret «Bolashaqtyń qaınary» ataýymen sý salasynyń eriktiler toby quryldy. Bul jumystyń Jambyl oblysynan bastalýy Taraz qalasynda Qazaq ulttyq sý sharýashylyǵy jáne ırrıgasıa ýnıversıtetiniń qaıta ashylýymen tikeleı baılanysy. Aldaǵy ýaqytta bul bastama Qazaqstannyń barlyq óńirin qamtıdy», – dedi Sý resýrstary jáne ırrıgasıa mınıstri Nurjan Nurjigitov.
Eske sala keteıik, byltyr qyrkúıek aıynda «Móldir bulaq» ekologıalyq aksıasy aıasynda Sý resýrstary jáne ırrıgasıa mınıstrligi men vedomstvoǵa qaraıtyn uıymdardyń mamandary elimiz boıynsha bulaqtar men jaǵalaý aýmaqtaryn tazalaý jumystaryn júrgizgen bolatyn. İs-sharaǵa 4 myńnan astam adam qatysyp, 300 tonnadan astam qoqys jınaldy.
Qazirgi ýaqytta «Qazgıdrogeologıa» ulttyq gıdrogeologıalyq qyzmeti Qazaqstan aýmaǵyndaǵy barlyq bulaqty túgendeý jumystaryn júrgizýdi bastady. Aldyn ala derekterge sáıkes, búgingi tańda 711 áleýetti bulaq anyqtaldy. Qor jáne muraǵat materıaldary negizinde 2772 bulaqty qamtıtyn karta jasaqtaldy. Bulaqtar sý resýrstary tapshylyǵy jaǵdaıynda sýmen qamtamasyz etýdiń qosymsha kózi retinde qarastyrylady.
