Almatydaǵy Shymbulaq taý-shańǵy kýrortynda ornalasqan Gusto meıramhanasy úlken daýdan keıin qonaqtarǵa qazaq tilinde qyzmet kórsetýdi qolǵa aldy, dep habarlaıdy Dalanews.kz.

Vıdeoda qyzmetkerler kelýshilerdi qazaqsha sóılep, qarsy alyp jatqany kórinedi.

“Memlekettik tildi meńgerý - elge, mádenıetke jáne kelýshilerge degen qurmettiń belgisi. Bizdiń komandada túrli ult ókilderi jumys isteıdi. Olardyń kópshiligi qazaq tilin sanaly túrde úırenip, qyzmet barysynda qoldanyp jatyr. Bul talpynystaryn baǵalaımyz jáne qoldaımyz”, - delingen resmı habarlamada.

Gusto ókilderi qyzmetkerler qazaqsha aksentpen sóılese de, til úırenýge yntaly ekenin atap ótti.

“Til - qoldanǵanda ǵana damıdy. Biz ózara qurmet pen qoldaýdy quptaımyz”, - dedi meıramhana basshylyǵy.

Aıta keteıik, buǵan deıin atalǵan meıramhanynyń ákimshisi Elena zańger Meıirman Shekeevpen kezdesip, onyń Instagram paraqshasynda vıdeo arqyly halyqtan keshirim suraǵan edi.

“Men Qazaqstan azamatymyn jáne halqymnan keshirim suraımyn. Emosıaǵa berilip “KSRO-da týdym” dep aıtqanym úshin keshirim ótinemin. Eshkimdi renjitý oıymda bolmady”, — dedi ol.

Vıdeoda Meıirman Shekeevtiń meıramhanaǵa baryp, mázirdegi qatelerdi túzetýdi suraǵany da kórinedi. Restoran ákimshiligi jaǵdaıǵa baılanysty keshirim surap, mázirdi túzetýge ýáde bergen.

Aıta keteıik, buǵan deıin meıramhana ákimshisi qazaqsha qyzmet kórsetýden bas tartyp, synǵa qalǵan edi. Keıin qyzmetker jumystan shyǵaryldy.