Neke AHAJ-da tirkelmeı qıylǵan «nıkah» úshin din qyzmetkerlerin 5–8 jylǵa deıin bas bostandyǵynan aıyrý kerek, mundaı usynysty Májilis depýtaty Murat Ábenov aıtty,, dep habarlaıdy Dalanews.kz.

Onyń sózinshe, resmı nekesiz dinı rásimder áıelderdiń konstıtýsıalyq quqyqtaryn óreskel buzyp otyr.

«Men bul máseleni buryn da kótergenmin. Áıelderdiń zańdy nekege turý quqyǵyn taptap otyrǵan dinı qyzmetkerler jaýapkershilikten tys qalmaýy kerek. Konstıtýsıa qabyldanǵannan keıin men olardyń qylmystyq jaýapkershiligin kúsheıtýdi usynamyn», – dedi Ábenov Májilis kýlýarynda.

Depýtattyń aıtýynsha, nıkah atyn jamylǵan mundaı qatynastardyń saldary aýyr.

«Qyzdar ózin zańdy nekede júrgendeı sezinedi, biraq shyn máninde quqyqsyz qalady. Balalar dúnıege keledi, olar da áleýmettik jáne quqyqtyq turǵyda qorǵalmaǵan», – dedi ol.

Ábenov AHAJ-da tirkelmegen nekeni «ortasha aýyr qylmys» dep baǵalap, oǵan sáıkes jaza da qatal bolýy tıis ekenin aıtty.

«Eń kemi 5–8 jyl. Bul áıel men balanyń taǵdyryna jaýapsyz qaraǵany úshin», – dedi depýtat.