Qazaqstannyń burynǵy senat depýtaty Ǵanı Qasymov eldiń áskerı qaýipsizdigine qatysty málimdeme jasap, qazirgi jahandyq ahýalǵa baılanysty ulttyq qorǵanys saıasatyn túbegeıli qaıta qaraý qajet ekenin aıtty, dep habarlaıdy Dalanews.kz.
Onyń aıtýynsha, álemdegi geosaıası jaǵdaıdyń ýshyǵýy Qazaqstandy óz qaýipsizdigine jańa kózqaraspen qaraýǵa májbúrlep otyr.
«Búkil álemde bolyp jatqan jaǵdaıdy eskere otyryp, respýblıkanyń áskerı doktrınasyn shuǵyl túrde qarastyrýdy usynamyn», - dedi Ǵanı Qasymov.
Ulttyq armıa men áskerı-ónerkásiptik keshendi kúsheıtý
Eks-depýtattyń pikirinshe, Qazaqstan eshkimge senbeı, óz qorǵanys áleýetin ózi qalyptastyrýy kerek.
«Eshkimge senbeı, eshkimge úmit artpaı, qýatty, zamanaýı ulttyq armıa men áskerı-ónerkásiptik keshendi qarqyndy damytý qajet», - dep jazdy ol.
Ortalyq Azıa men Ázerbaıjannyń birlesken qorǵanys odaǵy
Ǵanı Qasymov Ortalyq Azıa elderi men Ázerbaıjan arasynda ortaq áskerı-qorǵanys odaǵyn qurýdy da usyndy. Onyń oıynsha, aımaq elderi birikpeıinshe, syrtqy qaterlerge qarsy turý qıyn.
«Ortalyq Azıa memleketteri men Ázerbaıjannyń biryńǵaı áskerı qorǵanys odaǵyn qurý úshin saıası jáne dıplomatıalyq sharalar qabyldaýy kerek», - dedi ol.
Qasymov tek Qytaımen shektelmeı, Batys elderimen de qaýipsizdik salasynda kelisimder jasaý qajet dep esepteıdi. Onyń aıtýynsha, Ortalyq Azıa men Ázerbaıjanǵa AQSH pen Eýropa tarapynan da qosymsha qaýipsizdik kepildikteri qajet.
«Qytaıdan bólek, AQSH jáne eýropalyq memlekettermen de Ortalyq Azıa men Ázerbaıjandy kez kelgen áskerı basqynshylyqtan qorǵaýǵa arnalǵan jańa kepildikter jóninde kelisý kerek», - dedi eks-depýtat.
Shekara mańyn kúsheıtý
Burynǵy senator shekara mańyndaǵy aımaqtarǵa erekshe nazar aýdarý kerektigin atap ótti. Ol bul óńirlerdi damytýǵa qarjy bólip, jastar men áskerı qyzmetkerlerdi sol jaqqa kóshirýge yntalandyrý qajet dep sanaıdy.
«Shekaralyq aýdandardy ıgerý úshin qajetti qarjy bólip, ol jerlerge jas otbasylardy, áskerı qyzmetkerlerdi jáne basqa da azamattardy kóshirýge kúshti yntalandyrý tetikterin jasaý kerek», - dedi Qasymov.
"Memlekettik ıdeologıa armıany qoldaýǵa baǵyttalýy tıis"
Ǵanı Qasymovtyń pikirinshe, memlekettiń búkil ıdeologıasy armıanyń, ofıserler men sarbazdardyń bedelin nyǵaıtýǵa jumys isteýi qajet.
Ol sondaı-aq qazaqstandyq áskerı kadrlardy zamanaýı soǵys tájirıbesi bar sheteldik mamandar daıarlaýy tıis dep sanaıdy.
«Bizdiń áskerı kadrlardy AQSH, NATO, Qytaı, Túrkıa, Ázerbaıjan, Ýkraına jáne Reseıden kelgen, qazirgi soǵys jaǵdaıynda tájirıbesi bar joǵary deńgeıli mamandar oqytýy kerek», - dedi ol.
«Neǵurlym erte bastasaq – soǵurlym tynysh ómir súremiz»
Eks-senatordyń aıtýynsha, mundaı aýqymdy jumysty neǵurlym erte bastaý el halqynyń qaýipsizdigin soǵurlym senimdi etedi.
