5 aqpan kúni Qazaqstan aýmaǵynda, Almaty qalasynan soltústik-shyǵysqa qaraı 284 shaqyrym qashyqtyqta jer silkinisi tirkeldi, dep habarlaıdy Dalanews.kz.
Tótenshe jaǵdaılar mınıstrliginiń málimetinshe, jer silkinisi Astana ýaqytymen saǵat 13:42-de seısmıkalyq stansalar jelisi arqyly anyqtalǵan. Jerasty dúmpýiniń oshaǵy Qazaqstan aýmaǵynda ornalasqan.
Jetisý oblysynyń birqatar eldi mekenderinde jer silkinisi sezilgen. Atap aıtqanda, Panfılov aýdanynda, Tekeli qalasynda, Aqsý aýdanynyń Jansúgirov aýylynda jáne Sarqan qalasynda dúmpýdiń kúshi 3 balǵa jetken.
Al Qarabulaq kenti, Taldyqorǵan qalasy, Balpyq bı aýyly, Shonjy, Saryózek, Úshtóbe, Qyrǵyzsaı, Kókpek jáne Shelek aýyldarynda jer silkinisi 2 bal shamasynda sezilgen.
Tótenshe jaǵdaılar mınıstrliginiń dereginshe, zardap shekkender men qıraǵan nysandar týraly aqparat túsken joq. Jaǵdaı baqylaýda.
