Jetisý oblysynda polıseıler alaıaqtyń áreketin der kezinde áshkereledi, dep habarlaıdy Dalanews.kz.
Jetisý oblysyndaǵy saýda ortalyqtarynyń birinde polısıa telefonmen sóılesip turǵan egde jastaǵy áıelge nazar aýdarǵan. Áńgime sıpaty polıseılerge kúdik týdyrǵan.
Zeınetker qobaljyp, bireýdiń nusqaýymen áreket etip jatqandaı kóringen. Polısıa qyzmetkerleri belgisiz adamdar zeınetkerge qońyraý shalyp, "tekseris júrgizý" maqsatynda SMS arqyly kelgen kodty aıtýdy talap etkenin anyqtaǵan.
"Alaıaqtar onyń atyna 5 mıllıon teńge kóleminde nesıe rásimdeýge tyrysqan, alaıda bank tek 2 mıllıon teńgeni maquldaǵan. Dál osy somany zeınetker alaıaqtarǵa aýdarmaq bolǵan. Polısıa qyzmetkerleri telefondy berýdi surap, ózin Aısel dep tanystyrǵan adammen sóılesti. Ol zeınetkerdiń qyzy ekenin aıtty, biraq áıeldiń aty-jóni men tegin ataı almady, bul alaıaqtyq áreketti rastady", - dedi İİM ókili.
