Qurylys salasy Qazaqstannyń jalpy ishki óniminiń shamamen 6%-yn quraıdy. Keıbir jyldary qurylys jumystarynyń kólemi 15–18%-ǵa deıin ósip, ekonomıkanyń ortasha qarqynynan ozyp otyrdy, dep habarlaıdy Dalanews.kz.
2019–2024 jyldar aralyǵynda elde shamamen 98 mln sharshy metr turǵyn úı paıdalanýǵa berildi. 2025–2026 jyldarǵa memleket 31,6 mln sharshy metrden astam turǵyn úıdi paıdalanýǵa berýdi, tozyǵy jetken turǵyn úı qoryn jańǵyrtýdy jáne ondaǵan myń jer ýchaskesine ınjenerlik ınfraqurylym júrgizýdi josparlap otyr.
«Bir qaraǵanda, bári tamasha kórinedi, – dep pikir bildiredi Qazaq Expert Club sarapshysy Svetlana Nurtazına, – alaıda jobalardy basqarý salasynyń mamany retinde men qaı tustardy jaqsartý qajet ekenin kórip otyrmyn, sebebi áńgime júzdegen mıllıard teńge týraly bolyp otyr.
Muny Joǵary aýdıtorlyq palatanyń (JAP) aýdıtteri de rastaıdy. Tek 2025 jyldyń ózinde tekseris nátıjesi boıynsha aýdıtorlar 24 nysanda 355 mlrd teńgege zańbuzýshylyqtar anyqtady. Al 2025 jylǵa deıingi kezeńde 695 mln dollar (shamamen 355 mlrd teńge) kóleminde buzýshylyqtar, sonyń ishinde resýrstardy tıimsiz paıdalaný jáne josparlaý máseleleri anyqtalǵan».
Nurtazınanyń pikirinshe, negizgi sebep — qurylys jobalaryn basqarýdyń eskirgen modeli.
«2018 jyldan bastap Qazaqstanda Ulttyq jobalyq basqarý júıesi engizildi: úkimet, mınıstrlikter jáne ákimdikter janynan jobalyq keńseler quryldy. Biraq is júzinde keńselerdiń kópshiligi jobalardy basqarmaıdy, olardy ákimshilik turǵyda ǵana súıemeldeıdi: esepter jınaıdy, jıyntyq aqparat qalyptastyrady, aqparat usyný merzimderin baqylaıdy», – dep tolyqtyrdy sarapshy.
Onyń oıynsha, jaǵdaıdy ózgerte alatyn negizgi qadam — jobany basqarýǵa mandaty bar, sheshimderge, merzimderge, búdjetke jáne jobanyń arhıtektýrasyna yqpal ete alatyn basqarýshylyq býyndy engizý.
«Sonymen qatar jedel basqarýshylyq sheshimder de múmkin, – deıdi Svetlana. – Bul — jobalyq-smetalyq qujattamany ázirleý prosesin jobalyq keńseniń súıemeldeýi, qurylys-montaj jumystary kezeńinde baqylaý núktelerinde turaqty revú ótkizý, tek merzimder men búdjetti ǵana emes, sheshimderdiń ómirsheńdigin de taldaý».
Materıal Qazaq Expert Club qurylys salasyndaǵy sarapshysy Svetlana Nurtazınanyń pikirine negizdelip daıyndaldy.
