Astanaǵa kireberiste iri shirkeý salý bastamasy máslıhat depýtaty Baýyrjan Smaılovtyń synyna ushyrady, dep habarlaıdy Dala News.

Astana qalalyq máslıhatynyń otyrysynda elordaǵa kireberis aýmaqta Ortalyq Azıadaǵy eń iri shirkeý salý jospary talqylanyp, depýtat Baýyrjan Smaılov bul bastamaǵa ashyq qarsylyq bildirdi.

Depýtattyń aıtýynsha, qalada túrli konfesıalarǵa arnalǵan ǵıbadat oryndary jetkilikti, al elorda qaqpasyna aýqymdy shirkeý salý qoǵam úshin maqtanatyn joba emes.

«Ortalyq Azıadaǵy eń úlken shirkeý salynbaq deıdi. Oǵan qarjyny kim bólip jatyr? Ondaı nysan bizge shynymen qajet pe? Biz bul máseleni jan-jaqty taldadyq pa? Qalada shirkeýler bar, úlkeni de, kishisi de jetkilikti. Al elordanyń kireberisine osyndaı nysan salý maqtanatyn jaǵdaı emes», – dedi Baýyrjan Smaılov máslıhat otyrysynda.

Bul synǵa jaýap bergen Nura aýdanynyń ákimi Rıshat Turdybekov jobanyń burynnan bekitilgenin alǵa tartty. Onyń aıtýynsha, shirkeý qurylysy memlekettik búdjet esebinen salynbaıdy.

«Bul nysan bas josparǵa sáıkes qarastyrylǵan. Meshit bolsyn, shirkeý bolsyn búdjetten qarjy bólinbeıdi. Qurylys qaıyrymdylyq qarajat esebinen júrgiziledi. Atalǵan jospar 2018–2019 jyldary bekitilgen», – dedi aýdan ákimi.

Sonymen qatar, Rıshat Turdybekov bul másele boıynsha keıinirek qosymsha aqparat beriletinin málimdedi.

Aıta keteıik, elorda aýmaǵyndaǵy iri qurylys jobalary qoǵamda jıi pikirtalas týdyryp keledi. Bul joly da qala kelbeti men qoǵamdyq suranys arasyndaǵy tepe-teńdik máselesi kún tártibine shyqty.