Qazaqstanda 2040 jylǵa deıin ortaazıalyq tasbaqany (Testudo horsfieldii) aýlaýǵa jáne onyń barlyq ónimin satýǵa nemese paıdalanýǵa tyıym salyndy, dep habarlaıdy Dalanews.kz.
Ekologıa mınıstrliginiń Orman sharýashylyǵy jáne janýarlar dúnıesi komıtetiniń málimetinshe, sheshim ǵylymı derekter men popýlásıany monıtorıńteý nátıjelerine negizdelgen. Atalǵan túr osal janýar retinde tanylyp, Halyqaralyq tabıǵatty qorǵaý odaǵynyń (IUCN) Qyzyl tizimine jáne CITES konvensıasynyń II qosymshasyna engizilgen. Bul tasbaqaǵa qatysty qorǵaý sharalaryn kúsheıtýdi talap etedi.
Vedomstvo ókilderiniń aıtýynsha, atalǵan shara tabıǵı popýlásıaǵa túsetin júktemeni azaıtyp, bıoalýantúrlilikti saqtaýǵa múmkindik beredi. Tasbaqany zańsyz aýlaý nemese aınalymǵa engizý úshin qylmystyq jaýapkershilik qarastyrylǵan. Iaǵnı, 3000 AEK-ke deıin aıyppul, qoǵamdyq jumystar nemese úsh jylǵa deıin bas bostandyǵynan aıyrý, sondaı-aq múlik tárkilenýi múmkin.
