Qazaqstandyq mamandar atom energetıkasy jáne jasandy ıntellekt salasynda “Bolashaq” baǵdarlamasy aıasynda shetelde bilim alý múmkindigine ıe bolady. Bul týraly memlekettik keńesshi Erlan Qarın málimdedi, dep habarlaıdy Dalanews.kz.
Bıyl "Bolashaq" stıpendıasyna konkýrs erejeleri jańartyldy. Úmitkerler úsh kezeńnen turatyn irikteýden ótedi: keshendi testileý, suhbat jáne Respýblıkalyq komısıanyń eń joǵary upaı jınaǵan qatysýshylardy irikteýi. Sonymen qatar bir kúntizbelik jyl ishinde konkýrsqa qaıta qatysý múmkindigi qarastyrylǵan, bul áleýetti úmitkerlerge baǵdarlamada óz múmkindigin synaýǵa qosymsha múmkindik beredi.
Konkýrs qorytyndysy boıynsha 225 qazaqstandyq azamat halyqaralyq «Bolashaq» stıpendıasyn ıelendi. Orta eseppen bir orynǵa tórt úmitkerden keldi. Sondaı-aq, bıyl sheteldik joǵary oqý oryndary men ǵylymı ortalyqtarǵa qoıylatyn talaptar ózgerdi: olar halyqaralyq bedeldi reıtıńterde úzdik 100 orynǵa enýi kerek. Bul "Bolashaq" stıpendıasy aıasyndaǵy akademıalyq bilim sapasyn arttyrýǵa jol ashady.
Jańa stıpendıanttardyń 152-si magıstratýrada, 16-sy doktorantýrada oqıdy, al 57 otandasymyz sheteldik ýnıversıtetter men ortalyqtarda kásibı taǵylymdamadan ótedi. Sonymen qatar 182 qazaqstandyq álemniń jetekshi ǵylymı jáne zertteý ortalyqtarynda taǵylymdamadan ótýge grant aldy. İrikteý sapasyn arttyrý maqsatynda úmitkerlerge qoıylatyn talaptar kúsheıtildi: bedeldi basylymdarda ǵylymı maqalalardyń nemese halyqaralyq patentterdiń bolýy mindetti bolyp sanalady. Ǵylymı taǵylymdama baǵyttary Úkimet janyndaǵy Joǵary ǵylymı-tehnıkalyq komısıanyń basymdyqtaryna sáıkes úılestirildi.
Otyrysta 2026 jyly kásibı taǵylymdamadan ótýshiler úshin jańa sanat – "Jasandy ıntellekt júıesin paıdalanýshylar" bekitildi. Ekonomıkanyń túrli salasyn sıfrlandyrý baǵdarlamasy jasandy ıntellekt quzyretterin damytý qajettiligin týyndatady, bul ulttyq ekonomıkanyń básekege qabilettiligin arttyrý jáne negizgi salalardy damytý úshin mańyzdy dep sanalady.
Sonymen qatar 2026 jyldan bastap magıstratýra, doktorantýra jáne taǵylymdama boıynsha atom energetıkasy salasyndaǵy mamandardy daıarlaýǵa arnaıy sanat engiziledi. Jyl saıyn bul baǵytqa 20 kvota bólinedi, bul otandyq atom ónerkásibine qajetti bilikti kadrlardy ýaqtyly daıarlaýǵa múmkindik beredi.
Jalpy, jaratylystaný-tehnıkalyq baǵyttaǵy "Bolashaq" stıpendıalarynyń úlesi 2022 jylǵy 59,2%-dan 2025 jyly 70%-ǵa deıin ósti. Injenerlik-tehnıkalyq mamandyqtar boıynsha ǵylymı taǵylymdamalarǵa berilgen stıpendıalardyń úlesi 46%-dan 72,4%-ǵa artty.
Otyrys qorytyndysy boıynsha Erlan Qarın "Bolashaq" halyqaralyq stıpendıasyn odan ári iske asyrý jáne jetildirý jóninde naqty tapsyrmalar berdi.
