Memleket basshysynyń, Úkimettiń qoldaýymen Syr óńiri qarqyndy qurylys alańyna aınaldy. Aımaqta 2022 jyldan beri 200-ge jýyq halyqqa qajetti áleýmettik nysan salynyp, turǵyndar ıgiligine berildi. Bul týraly elordada ótken Ortalyq komýnıkasıalar qyzmetiniń brıfıńinde oblys ákimi Nurlybek Nálibaev atap ótti, dep habarlaıdy Dalanews.kz.
«Aımaǵymyzda sońǵy 3 jylda alǵash ret barlyq aýdanda jańadan turǵyn úıler salynyp, 1 800-ge jýyq, atap aıtqanda 2023 jyly 430, 2024 jyly 1015, 2025 jyly 332, jalpy 1777 páter jerlesterimizge tabys etildi. Bıyl 3600 páterlik turǵyn úıler salýǵa búdjetten 58 mlrd. 785 mln. teńge bólindi.
Bizdiń eń birinshi mindetimiz – balalarymyzdyń jan-jaqty sapaly bilim alýyna qolaıly jaǵdaı jasap, jaıly orta qalyptastyrý.
«Bilimdi qoldaý qorynyń» 8 mlrd. 400 mln. teńge qarjysyna fızıka-matematıka baǵytyndaǵy «Bilim-ınnovasıa» lıseı-ınternaty el ıgiligine tabystaldy.
Atalǵan qor esebinen 2 mlrd. 333 mln. teńgege salynǵan Aral aýdany Mergensaı aýylyndaǵy 150 oryndyq mektep jaqyn kúnderi paıdalanýǵa beriledi.
Qyzylorda qalasynda qurylysyna 11 mlrd. teńge qaralǵan balalar men jasóspirimderge arnalǵan «Syr juldyzdary» akademıasy, Jalaǵash, Jańaqorǵan, Shıeli aýdandarynda 3 mlrd. teńgeden astam qarjyǵa Oqýshylar úıi men Óner mektebi, oblys ortalyǵynda «QazMunaıGaz» ulttyq kompanıasynyń demeýshiligimen 2 mlrd. 500 mln teńgege zamanaýı Oqýshylar saraıy ashyldy. «Saýts Oıl» kompanıasy mýzykalyq kolejdiń jańa oqý ǵımaraty men jataqhanasyn salýǵa 4 mlrd. 800 mln. teńge demeýshilik jasady.
Qazirgi ýaqytta Prezıdent saıabaǵynda jyl boıy jumys isteıtin zamanaýı balalar tynyǵý lageri, Botanıkalyq bilim berý ortalyǵy boı kóterip keledi. Sondaı-aq, jumysshy mamandardy daıarlaýǵa arnalǵan «Quzyrettilik ortalyǵy» ǵımaraty da bastaldy», – dedi N.Nálibaev.
Memleket basshysynyń bastamasymen qolǵa alynǵan «Taza Qazaqstan» respýblıkalyq ekologıalyq baǵdarlamasy aıasynda oblys kóleminde kórkeıtý-kógaldandyrý, aýyl aımaqtardy abattandyrý jumystary qarqyndy júrýde. Bıyl qalalyq mádenı-demalys parki qaıta jańǵyrtýdan ótti. Qorqyt Ata memorıaldy aleıasy da jańǵyrtýdan keıin jaıly demalys ornyna aınaldy.
Jańarǵan Prezıdent saıabaǵy turǵyndar kóp jınalatyn qaladaǵy kórikti oryndardyń biri bolady. Búginde saıabaqta bes juldyzdy qonaqúı salynýda. Syrdarıa ózeni ústinen Astana shaǵyn aýdany men eki aralyqty baılanystyratyn jaıaý júrginshiler kópiri qurylysy josparlanǵan.
Óńirde 2023 jyldan beri oblystyq «Úlgili eldi meken» konkýrsy turaqty ótkizilip keledi. Úlgili aýyldarǵa oblystyq búdjet qarjysyna alynǵan 67 arnaıy tehnıka tabystaldy.
