Qazaqstandyq saıasattanýshy Ǵazız Ábishev reseılik nasıhatshy Vladımır Solovóvtiń daýly málimdemesine qatysty pikir bildirdi, dep habarlaıdy Dalanews.kz.
Buǵan deıin reseılik telejúrgizýshi Ortalyq Azıa men Kavkazdy Reseıdiń "yqpaldy aýmaǵy" retinde atap, qajet bolǵan jaǵdaıda atalǵan óńirlerge qarsy halyqaralyq quqyqty elemeı, áskerı kúsh qoldanýǵa bolatynyn ashyq túrde meńzegen edi.
"Bul málimdeme Kremldiń AQSH-tyń Venesýelaǵa qatysty áreketterine janama reaksıasy ma, álde Ortalyq Azıa men Kavkaz elderine baǵyttalǵan eskertý me, ne bolmasa Solovóvtiń jeke saıası demarshy ma - aıtý qıyn. Munyń bári qatar kelgen bolýy da múmkin", - dedi Ǵazız Ábishev.
Onyń pikirinshe, mundaı sebepsiz ári jarıa sıpattaǵy málimdemeler odaqtas elderge qatysty memleketaralyq qarym-qatynas ádebiniń buzylýy retinde baǵalanýy tıis.
"Bir nárseni naqty ajyrata bilý kerek. Óz elińniń geosaıası múddelerin ashyq aıtý - qalypty jaǵdaı. Al kórshi memlekettermen yqtımal áskerı qaqtyǵysqa qoǵamdy aldyn ala daıyndaý múlde basqa másele", - dep atap ótti saıasattanýshy.
Sondaı-aq Ábishev óshpendilikke negizdelgen mundaı rıtorıkanyń naqty saldary bar ekenin eskertti. Onyń sózinshe, dál osyndaı málimdemelerden keıin Qazaqstan sekildi elderdiń kópvektorly saıasat ustanyp, Qytaı, Túrkıa jáne ózge memlekettermen, onyń ishinde áskerı yntymaqtastyqty damytýy keıbir ortada teris qabyldana bastaıdy.
"Sodan soń "olar bizge qarsy birdeńe oılastyryp jatyr ma, nege basqa eldermen jaqyndasady, nege qarý alady, nege birlesken jattyǵýlar ótkizedi" degen orynsyz kúdik týyndaıdy. Al mundaı kózqarastyń qaıdan shyqqanyna mán berilmeı jatady", — dedi ol.
Sovolevtiń málimdemesi
Eske salaıyq, buǵan deıin reseılik nasıhatshy Vladımır Solovóv Máskeý "arnaıy áskerı operasıany" tek Ýkraınada emes, postkeńestik keńistiktegi ózge elderde de bastaýy múmkin ekenin málimdegen edi.
Onyń aıtýynsha, Reseı úshin eń qaýipti aımaqtar - Armenıa men Ortalyq Azıa memleketteri. Solovóv bul baǵyttar ulttyq qaýipsizdik turǵysynan Sırıa nemese Venesýeladaǵy jaǵdaıdan áldeqaıda mańyzdy ekenin aıtty.
"Armenıadan aıyrylý - asa úlken másele. Azıadaǵy, naqtyraq aıtqanda ózderi Ortalyq Azıa dep ataıtyn óńirdegi túıtkilder - biz úshin aýqymdy qater. Sondyqtan maqsattarymyz ben mindetterimizdi ashyq ári naqty aıqyndaý qajet. “Oıyn aıaqtaldy” dep týra aıtý kerek. Halyqaralyq quqyq pen halyqaralyq tártipke súıenýdiń qajeti joq. Eger ulttyq qaýipsizdigimiz úshin Ýkraınada arnaıy áskerı operasıa bastaýǵa májbúr bolsaq, dál osy ýájben ózimiz yqpal aımaǵy dep sanaıtyn basqa óńirlerde de osyndaı qadamǵa barýǵa ne kedergi?", - degen edi ol.
