Shymkent qalasynyń ákimi Ǵabıt Syzdyqbekovtiń tóraǵalyǵymen Quqyq buzýshylyq profılaktıkasy jónindegi vedomstvoaralyq komısıanyń kezekten tys otyrysy ótti. Jıynǵa quqyq qorǵaý jáne arnaýly organdardyń basshylary, máslıhat depýtattary, Qoǵamdyq keńes músheleri men buqaralyq aqparat quraldarynyń ókilderi qatysty.
Otyrys barysynda qaladaǵy krımınogendik ahýal, qabyldanyp jatqan aldyn alý sharalarynyń tıimdiligi jáne qoǵamdyq qaýipsizdikti qamtamasyz etýdegi vedomstvoaralyq ózara is-qımyl máseleleri talqylandy. Kún tártibi boıynsha Shymkent qalalyq polısıa departamenti bastyǵynyń mindetin atqarýshy Arman Beısenbaev, Quqyqtyq statısıka jáne arnaıy esepke alý jónindegi komıtettiń qalalyq departamentiniń basshysy Órken Seıitov jáne qala prokýrorynyń orynbasary Rashıd Ámırov baıandama jasady.
Qala ákimi quqyq buzýshylyqtyń aldyn alý memlekettik organdar qyzmetiniń negizgi basymdyqtarynyń biri bolyp qala berýge tıis ekenin atap ótti. Ol jańa «Quqyq buzýshylyq profılaktıkasy týraly» zańnyń kúshine enýine baılanysty jergilikti deńgeıde aldyn alý sharalaryn kúsheıtý, qaýip-qaterlerdi erte kezeńde anyqtaý jáne keshendi tásildi engizýdiń mańyzyn aıtty.
«Negizgi nazar quqyq buzýshylyqtardy erte anyqtaýǵa qoıylýy kerek. Profılaktıka – tek quqyq qorǵaý organdarynyń ǵana emes, búkil memlekettik apparattyń ortaq mindeti. Bul jumys júıeli ári turaqty túrde júrgizilýi tıis», – dedi Ǵabıt Syzdyqbekov.
Sonymen qatar megapolıs basshysy aýyr quqyq buzýshylyqtardyń, onyń ishinde kámeletke tolmaǵandar arasyndaǵy sýısıd jaǵdaılarynyń aldyn alýǵa erekshe kóńil bóldi.
«Ókinishke qaraı, Shymkentte mundaı qaıǵyly jaǵdaılar tirkelip otyr. Olardyń aldyn alý – búkil qoǵamnyń ortaq jaýapkershiligi. Úıde – ata-ana, mektepte – muǵalim, kóshede – árbir azamat beıjaı qalmaýy tıis. Sondyqtan aqparattyq-túsindirý jumystaryn kúsheıtý asa mańyzdy», – dedi qala ákimi.
Jıyn qorytyndysynda Ǵabıt Syzdyqbekov jaýapty organdarǵa birqatar naqty tapsyrma berip, quqyq qorǵaý organdary men aýdan ákimderine ózara úılesimdi ári júıeli jumys isteýdi mindettedi.
