KHDR basshysy Kım Chen Yn Áskerı-teńiz kúshterine qarasty nysanǵa baryp, ıadrolyq qozǵaltqyshy bar, salmaǵy shamamen 8700 tonnany quraıtyn strategıalyq súńgýir qaıyqtyń qurylys barysymen tanysty. Bul týraly STAK agenttigi málimdedi, dep habarlaıdy Dalanews.kz.
Agenttik málimetinshe, Kım Chen Yn súńgýir qaıyqtyń qurylysyn jeke ózi qarap, qazirgi kezeń boıynsha baıandama tyńdaǵan. Onymen birge keme jasaý salasynyń basshylary men qorǵanys ǵylymynyń ókilderi bolǵan.
Atalǵan súńgýir qaıyq basqarylatyn zymyrandardy ushyrýǵa arnalǵan strategıalyq atomdyq keme retinde sıpattalady. Joba Koreıanyń Eńbek partıasynyń VIII sezinde bekitilgen eldiń qorǵanys áleýetin damytýǵa baǵyttalǵan bes negizgi mindettiń qataryna kiredi.
Kım Chen Ynnyń aıtýynsha, mundaı súńgýir qaıyqty salý – KHDR-dyń derbes qorǵanys saıasatyn iske asyrýdaǵy mańyzdy qadam. Phenán bıligi qýatty shabýyl múmkindikterin ulttyq qaýipsizdikti qorǵaý men tejeýdiń basty tetigi retinde qarastyrady.
STAK málimetinshe, jańa atomdyq súńgýir qaıyqtyń qurylysy aıaqtalsa, bul eldiń áskerı-teńiz kúshteri úshin betburys kezeń bolady.
Sondaı-aq Kım Chen Yn Ońtústik Koreıanyń AQSH qoldaýymen atomdyq súńgýir qaıyq jasaýdy josparlap otyrǵanyn synǵa alyp, ony KHDR qaýipsizdigi men teńiz egemendigine tóngen qater dep atady.
KHDR basshysy elde sonymen qatar soqqy beretin esmınester men basqa da atomdyq súńgýir qaıyqtardyń qurylysy jalǵasyp jatqanyn, jańa sýasty qarýlary ázirlenip jatqanyn málimdedi. Ol flotty kúsheıtý kemelerdiń qurylys qarqyny men aýqymyn arttyrý, sondaı-aq olardy túrli shabýyl júıelerimen jabdyqtaý arqyly júzege asatynyn aıtty.
Alaıda KHDR málimdegen súńgýir qaıyqtyń tehnıkalyq sıpattamalaryn táýelsiz túrde rastaý múmkin emes. Phenán mundaı derekterdi jarıalamaıdy ári syrtqy baqylaýshylardy áskerı nysandarǵa kirgizbeıdi. Sarapshylardyń aıtýynsha, Soltústik Koreıa buǵan deıin de qarý-jaraqtyń maketteri men prototıpterin kórsetip, olardyń daıyndyq deńgeıin asyra baǵalaǵan jaǵdaılar bolǵan.
