Tatneft Qazaqstan aýmaǵynda júzege asyrylýy tıis bolǵan «Býtadıen» jobasyna qatysýdan shyqqan, dep habarlaıdy Dalanews.kz.

Petro council málimetinshe, quny shamamen 1 mlrd AQSH dollar bolatyn bul joba Atyraý oblysy aýmaǵynda býtadıen jáne sonyń negizinde óndiriletin ónimderge arnalǵan iri munaı-hımıa keshenin salýdy kózdegen. Joba joǵary qosylǵan quny bar munaı-hımıa ónimderin damytýdaǵy strategıalyq bastamalardyń biri retinde qarastyrylǵan.

Bastapqy kezeńde joba birlesken kásiporyn formatynda júzege asyrylyp, onyń 75 paıyzy «Tatneftke», al 25 paıyzy qazaqstandyq tarapqa tıesili bolǵan.

Buǵan deıin, ótken jyldyń jeltoqsan aıynda, EPC-merdigerdi anyqtaý josparlanǵan edi. Bul jobanyń belsendi iske asyrý kezeńine ótýin bildirýi tıis bolatyn. Alaıda qazirgi tańda negizgi strategıalyq seriktestiń jobadan shyqqany belgili bolyp otyr. Bul jaǵdaı jobanyń ári qaraıǵy merzimine de, ony júzege asyrý formatyna da tikeleı áser etýi múmkin.