جارما اۋدانىن اۋىزسۋمەن قامتاماسىز ەتەتىن "گورۆودحوز" مەملەكەتتىك باقىلاۋ تالاپتارىن ورىنداماعانى ءۇشىن اكىمشىلىك جاۋاپكەرشىلىككە تارتىلدى، دەپ حابارلايدى Dala News.
مەملەكەتتىك باقىلاۋ اياسىندا جۇرگىزىلگەن تەكسەرىس بارىسىندا سۋ ەسەپتەگىش قۇرالدارىنىڭ ۋاقىتىلى تەكسەرىلمەگەنى انىقتالعان. بۇعان دەيىن بەرىلگەن زاڭدى نۇسقاما بەلگىلەنگەن مەرزىمدە ورىندالماعان.
وسىعان بايلانىستى ۋاكىلەتتى ورگان "گورۆودحوزعا" قاتىستى اكىمشىلىك قۇقىقبۇزۋشىلىق تۋرالى كودەكستىڭ 462-بابىنىڭ 3-بولىگى بويىنشا حاتتاما تولتىرعان. اتالعان باپ مەملەكەتتىك باقىلاۋ ورگاندارىنىڭ زاڭدى تالاپتارىن ەلەمەگەنى ءۇشىن جاۋاپكەرشىلىكتى كوزدەيدى.
اباي وبلىسى بويىنشا تەحنيكالىق رەتتەۋ جانە مەترولوگيا كوميتەتى دەپارتامەنتىنىڭ مالىمەتىنشە، سۋ ەسەپتەگىشتەردىڭ ۋاقتىلى تەكسەرىلۋى سۋ شىعىنىن ناقتى ەسەپتەۋ، ينجەنەرلىك جەلىلەردىڭ جاي-كۇيىن باقىلاۋ جانە تۇتىنۋشىلاردىڭ قۇقىعىن قورعاۋ ءۇشىن اسا ماڭىزدى. تەكسەرىلمەگەن قۇرالدار دەرەكتەردىڭ بۇرمالانۋىنا جانە تۇرعىنداردىڭ مۇددەسىنە نۇقسان كەلتىرۋى مۇمكىن.
"گورۆودحوز" – تىرشىلىكتى قامتاماسىز ەتەتىن نىسان. ونىڭ جۇمىسىنداعى كەز كەلگەن ولقىلىق تۇرعىندارعا، الەۋمەتتىك مەكەمەلەرگە، اۋىل شارۋاشىلىعى مەن بيزنەسكە تىكەلەي اسەر ەتەدى. سوندىقتان بۇل سالاداعى تالاپتاردىڭ ورىندالۋى مىندەتتى.
ءىستى قاراۋ ناتيجەسىندە سوت گورۆودحوزدى كىنالى دەپ تانىپ، 302 750 تەڭگە كولەمىندە ايىپپۇل سالدى.
كوميتەت ءتوراعاسىنىڭ ورىنباسارى باۋىرجان قاسىموۆتىڭ ايتۋىنشا، كاسىپكەرلىك كودەكسىنە سايكەس بەرىلگەن نۇسقامالار مىندەتتى تۇردە ورىندالۋى ءتيىس، ال ولاردى ورىنداماۋ زاڭمەن جازالانادى.
